خلیج اردو
ابوظبی: ابوظبی انڈین اسکول کے 17 سالہ طالبعلم الیکس بنوی کی یاد میں جمعہ کو سینٹ جوزف کیتھیڈرل میں دعائیہ تقریب منعقد ہوئی جس میں 300 سے زائد افراد، جن میں ان کے دوست، اساتذہ اور رشتہ دار شامل تھے، نے شرکت کی۔
الیکس جمعرات کی سہ پہر اپنے رہائشی عمارت کی تیسری منزل سے گر گئے تھے۔ یہ واقعہ ابوظبی میں اس وقت پیش آیا جب وہ ممکنہ طور پر اپنی خوابیدہ شوق، یعنی فلم سازی کے سلسلے میں ایک رِیل بنا رہے تھے۔ ایک قریبی رشتہ دار کے مطابق، "الیکس نے اپنے کمرے کی کھڑکی (جو سلائیڈنگ ڈور ہے) سے ریل بناتے ہوئے توازن کھو دیا، اور نیچے گر پڑے۔”
یہ واقعہ گھر والوں کے علم میں اس وقت آیا جب عمارت کے چوکیدار نے اطلاع دی۔ الیکس کو فوری طور پر اسپتال منتقل کیا گیا، مگر وہ زخموں کی تاب نہ لاتے ہوئے جانبر نہ ہو سکے۔
الیکس، جو تین بہن بھائیوں میں سب سے چھوٹے تھے، سی بی ایس ای گریڈ 12 کے نتائج کے منتظر تھے۔ ان کے والد بِنوی تھامس اور والدہ السی بِنوی طویل عرصے سے ابوظبی میں مقیم ہیں۔ ان کی والدہ ایک اسپتال میں نرس کے طور پر خدمات انجام دے رہی ہیں۔
ان کے بھائیوں میں ڈاکٹر راہول بِنوی بھارت میں مقیم ہیں جبکہ دوسرے بھائی، روہت بِنوی پولینڈ میں کام کرتے ہیں۔
اہل خانہ کے ایک بزرگ رکن، 70 سالہ رائے کے تھامس کے مطابق، "الیکس ایک بہت خوش مزاج اور ملنسار شخصیت کے حامل تھے، وہ چھوٹے ہوں یا بڑے، ہر کسی سے گلے ملتے تھے۔ وہ سب کے دلوں میں گھر کر چکے تھے۔”
الیکس کی میت ہفتہ 26 اپریل کو رات 10:40 بجے بھارت کے لیے روانہ کی جائے گی، جہاں ان کی تدفین کی جائے گی۔ وہ بنگلور کی ایک یونیورسٹی میں ماس کمیونیکیشن کی تعلیم کے لیے پہلے ہی منتخب ہو چکے تھے، کیونکہ وہ فلم ڈائریکٹر بننے کا خواب دیکھتے تھے۔
