خلیج اردو
دبئی:متحدہ عرب امارات کے رہائشی گرمیوں کی تعطیلات میں یورپ کا سفر معمول بنا چکے ہیں، جہاں وہ خوشگوار موسم، طویل دن اور متحرک ثقافتوں سے لطف اندوز ہوتے ہیں۔ تاہم، اس سیزن میں شینجن ویزا کی زیادہ طلب کے باعث اپوائنٹمنٹ حاصل کرنا مشکل ہو سکتا ہے۔
سفر کے ماہرین کا کہنا ہے کہ ویزا اپوائنٹمنٹ جلد لینے سے سفری منصوبوں میں کسی بھی رکاوٹ سے بچا جا سکتا ہے۔ وائز فاکس ٹورزم کے سینیئر مینیجر، سبیر تھیکے پوراتھ والا پل کا کہنا ہے کہ "فی الحال کچھ ممالک جیسے چیک ریپبلک، آسٹریا اور سویڈن کے لیے اپریل میں اپوائنٹمنٹ دستیاب ہیں، لیکن فرانس اور اسپین کے لیے اس وقت کوئی خالی سلاٹ نہیں ہے۔”
شینجن ویزا کے پراسیسنگ کا وقت ایک سے تین ہفتے کا ہوتا ہے، اور درخواست گزاروں کو دستاویزات جمع کرانے کے لیے وی ایف ایس جیسے ویزا مراکز جانا ہوتا ہے۔ کچھ ممالک، جیسے پولینڈ، میں درخواست دہندگان کو اپنے دستاویزات براہ راست سفارت خانے میں جمع کرانے ہوتے ہیں۔
گلا داری انٹرنیشنل ٹریول سروسز کے مینیجر میر وسیم راجہ کے مطابق "اپریل اور مئی میں اپوائنٹمنٹ محدود ہیں، اور فرانس، اسپین اور نیدرلینڈز کے لیے ویزا کی طلب بہت زیادہ ہے۔”
ماہرین کا یہ بھی مشورہ ہے کہ درخواست گزار اپنے سفری دستاویزات کی درستگی کو یقینی بنائیں، خاص طور پر یہ کہ واپسی پر ان کا پاسپورٹ کم از کم چھ ماہ اور یو اے ای ویزا تین ماہ کے لیے کارآمد ہو۔
