متحدہ عرب امارات کے رہائشیوں کی آخری گرمیوں کی چھٹی کی منصوبہ بندی، فضائی کرایوں میں معمولی اضافہ

خلیج اردو
متحدہ عرب امارات میں جمعہ 5 ستمبر کو یوم ولادتِ حضرت محمد مصطفیٰ ﷺ کی تعطیل کے موقع پر رہائشی ایک اور مختصر چھٹی منانے کی تیاری کر رہے ہیں۔ ہفتہ اور اتوار کے ساتھ مل کر تین روزہ وقفہ لوگوں کے لیے گرمیوں کے اختتام پر ایک بہترین موقع بن گیا ہے کہ وہ کہیں سیر و تفریح کے لیے نکل سکیں۔

ٹریول ایجنسیوں کے مطابق اس بار زیادہ طلب ان کنواروں اور نئے شادی شدہ جوڑوں کی طرف سے سامنے آ رہی ہے جنہوں نے گرمیوں کے دوران بیرون ملک سفر نہیں کیا جبکہ زیادہ تر خاندان پہلے ہی چھٹیاں گزارنے جا چکے ہیں۔ بعض کمپنیوں نے بھی سنگل ملازمین کو گرمیوں میں کام کرنے پر آمادہ کیا تاکہ وہ اپنی چھٹیاں بعد میں استعمال کر سکیں، یہی وجہ ہے کہ یہ غیر متوقع لمبا ویک اینڈ ان کے لیے ایک موقع بن گیا ہے۔

لگژری ٹریولز کے کنسلٹنٹ پون پوجاری کے مطابق یہ چھٹی بہت سے ایسے نوجوانوں اور جوڑوں کے لیے نعمت ثابت ہوئی ہے جو جولائی یا اگست میں سفر نہیں کر پائے تھے۔ ان کے مطابق لوگ گرمی سے بچنے اور قریب ترین ممالک میں چند دن سکون سے گزارنے کے خواہاں ہیں۔

پسندیدہ منزلوں میں آذربائیجان، ازبکستان، قازقستان، جارجیا اور آرمینیا شامل ہیں جبکہ بغیر بچوں والے جوڑے مالدیپ اور سری لنکا جا رہے ہیں تاکہ وہاں کے ساحل اور خوشگوار موسم سے لطف اندوز ہو سکیں۔ ماہرین کے مطابق یہ ممالک اس لیے بھی زیادہ پسند کیے جا رہے ہیں کہ پرواز کا دورانیہ کم ہے اور جیٹ لیگ کا سامنا نہیں کرنا پڑتا، یوں وقت کا زیادہ سے زیادہ فائدہ اٹھایا جا سکتا ہے۔

روہ ٹریولز کے سیلز ڈائریکٹر لبن ورگیز کے مطابق نئی شادی شدہ جوڑے مالدیپ اور سری لنکا کی بکنگ زیادہ کر رہے ہیں، جبکہ کنوارے نوجوان باکو، تبلیسی اور الماتے کو ترجیح دے رہے ہیں۔

فضائی کرایوں میں معمولی اضافہ بھی دیکھا گیا ہے۔ خلیج ٹائمز کی اسکائی اسکینر کے ڈیٹا پر مبنی تجزیے کے مطابق:

• دبئی سے باکو کی براہ راست پرواز 4 ستمبر کو 548 درہم کی ہے جبکہ 11 ستمبر کو یہی کرایہ 450 درہم ہے۔

• جارجیا کے تبلیسی کے لیے 4 ستمبر کو 615 درہم جبکہ اگلے ہفتے 520 درہم ہے۔

• قازقستان کا کرایہ 4 ستمبر کو 736 درہم ہے جو 11 ستمبر کو 614 درہم ہو جائے گا۔

• مالدیپ کا ٹکٹ 4 ستمبر کو 605 درہم جبکہ اگلے ہفتے 498 درہم میں دستیاب ہوگا۔

ٹریول کنسلٹنٹس کے مطابق عوامی تعطیلات کے دوران طلب میں اضافے کی وجہ سے فضائی کرایوں میں معمولی اضافہ ایک عام بات ہے۔

ماہرین کے مطابق ستمبر کے آغاز کے ساتھ ہی گرمی کے موسم کا اختتام ہو رہا ہے اور یہ لمبا ویک اینڈ گرمیوں کی چھٹیوں کا آخری موقع سمجھا جا رہا ہے۔ پون پوجاری نے کہا کہ یہ صرف ایک چھٹی نہیں بلکہ بہت سے لوگوں کے لیے ان کی گرمیوں کا اختتامی باب ہے۔