متحدہ عرب امارات: ’ویلیجز پراجیکٹ‘، دور دراز کمیونٹیز میں زندگی اور سہولیات کی بحالی

خلیج اردو
2023 میں شیخ ذیاب بن محمد بن زاید آل نہیان، ڈپٹی چیئرمین صدارتی دیوان برائے ڈویلپمنٹ اینڈ فالن ہیروز افیئرز نے ’’یو اے ای ویلیجز‘‘ پراجیکٹ کا آغاز کیا۔ یہ ایک اسٹریٹجک اقدام ہے جس کا مقصد دیہی علاقوں کی ہمہ جہتی اور پائیدار ترقی کو یقینی بنانا ہے۔

اس منصوبے کے تحت ابو ظبی کی دیہی بستیوں کو ایسے مراکز میں بدلنے کی کوشش کی جا رہی ہے جو معاشی، سماجی اور ثقافتی ترقی کے امتزاج کا عکاس ہوں۔ اس میں بنیادی ڈھانچے کی بہتری، ضروری سہولیات کی فراہمی اور ایک پرکشش معاشی و سیاحتی ماحول پیدا کرنے پر زور دیا گیا ہے جو متحدہ عرب امارات کی ثقافتی وراثت کو اجاگر کرے۔

مقامی رہائشیوں نے اس اقدام کو معیاری طرز زندگی کے قیام اور روزمرہ زندگی میں آسانی کی طرف ایک بڑا قدم قرار دیا ہے جو ان کے استحکام اور سرزمین سے رشتے کو مزید مضبوط کرتا ہے۔ تاہم بعض دور دراز علاقوں میں اب بھی سہولیات تک رسائی ایک چیلنج ہے جس کے لیے تیز رفتار ترقیاتی اقدامات کی ضرورت ہے۔

رامہ میں رہائشیوں نے تجارتی مراکز، ایندھن اسٹیشنوں، تعلیمی اداروں کی توسیع اور عوامی پارکس کی بہتری کا مطالبہ کیا۔ بعض نے سٹریٹ لائٹس اور صفائی کے نظام میں بہتری پر زور دیا جبکہ ایک نوجوان کاروباری نے ’’روڈ ٹرپ کافی‘‘ کے قیام کو مقامی معیشت کے لیے مثبت تجربہ قرار دیا۔

الخزنة کے رہائشیوں نے مزید کمرشل مراکز، بہتر سڑکوں، طبی اور تعلیمی سہولیات اور گھروں تک ڈلیوری سروسز کی ضرورت پر زور دیا۔

ابو سمرہ میں باشندوں نے ریسٹورنٹس اور فارمیسیز کی ڈلیوری سروسز، ہیلتھ سینٹرز، بینک، 24 گھنٹے ایمرجنسی سہولت اور تفریحی مقامات کے قیام کا مطالبہ کیا۔

سویحان میں رہائشیوں نے کمرشل مراکز، بہتر طبی سہولیات، چائلڈ کیئر سنٹرز اور اسپورٹس کلبز کی ضرورت پر زور دیا۔

القاعدہ میں زیادہ تر سہولیات موجود ہیں مگر 24 گھنٹے اسپتال کی کمی رہائشیوں کی بڑی پریشانی ہے۔

السیلہ میں رہائشیوں نے قریبی ہسپتال، فارمیسیز، بیکریاں، گروسری اسٹورز اور فیول اسٹیشن کے قیام پر زور دیا اور پارکس کی تجدید کی درخواست کی۔

المقام میونسپلٹی کی کمیونٹی کمیونیکیشن سربراہ مریم العلوی کے مطابق میونسپلٹی رہائشیوں کی ضروریات کا مسلسل جائزہ لیتی ہے اور انہیں متعلقہ حکام تک پہنچایا جاتا ہے۔ منصوبوں میں پارکس، واک ویز، کلینکس، مساجد، اسکولز اور کمیونٹی مارکیٹس کی تعمیر شامل ہے۔

’یو اے ای ویلیجز پراجیکٹ‘ ایک قومی ماڈل کے طور پر سامنے آ رہا ہے جو شہری ترقی اور ثقافتی و سماجی وراثت کے تحفظ کے امتزاج کو ظاہر کرتا ہے۔ رہائشیوں کی امیدیں حکومت کی توجہ اور قیادت کی کوششوں سے وابستہ ہیں تاکہ مزید سہولیات فراہم ہوں اور ان کا اپنے وطن سے تعلق مزید مضبوط ہو۔