یو اے ای میں دھند کے باعث ریڈ اور یلو الرٹ جاری، شہریوں کو احتیاط کی ہدایت

خلیج اردو
متحدہ عرب امارات کے محکمہ موسمیات نے بدھ 8 جولائی کے لیے صبح کے اوقات میں دھند کے باعث ریڈ اور یلو الرٹ جاری کر دیا ہے جبکہ ابوظبی پولیس نے بھی کم حدِ نگاہ کے پیش نظر گاڑی چلانے والوں کو انتہائی احتیاط برتنے اور الیکٹرانک سائن بورڈز پر درج رفتار کی حدود پر عمل کرنے کی ہدایت کی ہے۔

محکمہ موسمیات کے مطابق آج ملک بھر میں موسم عمومی طور پر صاف رہے گا تاہم بعض علاقوں میں جزوی ابر آلود رہنے کا امکان ہے جبکہ رات کے وقت بادل بھی چھا سکتے ہیں۔

جنوب مغربی سے شمال مغربی سمت کی ہلکی سے معتدل ہوائیں 10 سے 25 کلومیٹر فی گھنٹہ کی رفتار سے چلیں گی جو بعض اوقات تیز ہو کر 40 کلومیٹر فی گھنٹہ تک پہنچ سکتی ہیں۔ مغربی علاقوں میں دن کے وقت گردوغبار بھی اٹھنے کا امکان ہے۔

ملک میں زیادہ سے زیادہ درجہ حرارت 48 ڈگری سینٹی گریڈ تک جا سکتا ہے جبکہ ابوظبی میں 40 اور دبئی میں 39 ڈگری سینٹی گریڈ رہنے کی توقع ہے۔ کم سے کم درجہ حرارت ابوظبی میں 30، دبئی میں 31 اور اندرونی علاقوں میں 27 ڈگری سینٹی گریڈ تک رہ سکتا ہے۔

محکمہ موسمیات نے پیش گوئی کی ہے کہ رات اور جمعرات کی صبح ساحلی علاقوں میں نمی میں اضافہ ہوگا۔ ابوظبی میں نمی کا تناسب 20 سے 60 فیصد جبکہ دبئی میں 25 سے 70 فیصد تک رہنے کا امکان ہے۔

عرب خلیج میں سمندر کی صورتحال ہلکی سے معتدل رہے گی تاہم مغربی علاقوں میں بعض اوقات سمندر طوفانی ہو سکتا ہے جبکہ بحیرۂ عمان میں سمندر عمومی طور پر پرسکون رہنے کی توقع ہے۔