خلیج اردو
متحدہ عرب امارات کے صدر شیخ محمد بن زاید النہیان کی ہدایات پر متحدہ عرب امارات نے وینزویلا میں آنے والے دو طاقتور زلزلوں کے متاثرین کے لیے ایک کروڑ امریکی ڈالر کی فوری انسانی امداد مختص کر دی ہے۔ یہ امداد یو اے ای ایڈ ایجنسی کے ذریعے متاثرہ علاقوں تک پہنچائی جائے گی۔
یہ امدادی اقدام وینزویلا کے شمالی ساحل کے قریب شہر مورون کے اطراف آنے والے دو شدید زلزلوں کے بعد کیا گیا، جنہوں نے بڑے پیمانے پر جانی و مالی نقصان پہنچایا۔ امدادی پیکیج کا مقصد ابتدائی بحالی کے عمل کو تیز کرنا، متاثرہ افراد کو خوراک، طبی سامان، پناہ گاہوں کا سامان اور دیگر ضروری امدادی اشیا فراہم کرنا ہے۔
یو اے ای ایڈ ایجنسی کے چیئرمین طارق احمد العامری نے کہا، "متحدہ عرب امارات قدرتی آفات اور انسانی بحرانوں سے متاثرہ افراد کی مدد کو اپنی انسانی ذمہ داری سمجھتا ہے، اور یہ جذبہ بانیٔ امارات شیخ زاید بن سلطان النہیان کے انسان دوست وژن کا تسلسل ہے۔”
انہوں نے مزید کہا کہ زلزلہ متاثرین اس وقت انتہائی مشکل حالات سے گزر رہے ہیں، اس لیے فوری امداد ناگزیر ہے۔ یو اے ای ایڈ ایجنسی وینزویلا کی حکومت اور بین الاقوامی اداروں کے ساتھ رابطے میں ہے تاکہ خوراک، طبی امداد اور عارضی رہائش کا سامان جلد از جلد متاثرین تک پہنچایا جا سکے۔
دوسری جانب وینزویلا میں امدادی کارروائیاں تیزی سے جاری ہیں، جہاں مقامی اور غیر ملکی امدادی ٹیمیں ملبے تلے دبے افراد کو نکالنے میں مصروف ہیں۔ حکام کے مطابق اب تک 920 افراد کی ہلاکت اور 3,360 کے زخمی ہونے کی تصدیق ہو چکی ہے، جبکہ سیکڑوں افراد لاپتا ہیں اور پچاس ہزار سے زائد افراد کے بارے میں معلومات حاصل کرنے کے لیے خصوصی ویب پورٹل قائم کیا گیا ہے۔
امریکی جیولوجیکل سروے نے خدشہ ظاہر کیا ہے کہ ہلاکتوں کی مجموعی تعداد دس ہزار سے تجاوز کر سکتی ہے، جس کی صورت میں یہ گزشتہ ایک صدی کے دوران لاطینی امریکہ کے مہلک ترین زلزلوں میں شمار ہوگا۔
