سابق اماراتی فوجی محمد فرج المناک حادثے میں جاں بحق، اہل خانہ کا سفر غم میں بدل گیا

خلیج اردو
دبئی: سابق اماراتی فوجی محمد فرج ہفتے کے روز عمان کے حیما روڈ پر پیش آنے والے ایک خوفناک ٹریفک حادثے میں جاں بحق ہو گئے۔ حادثے کی تصدیق ان کے بیٹے صبری التمیمی نے خلیج ٹائمز سے گفتگو میں کی۔ 70 سالہ محمد فرج اپنی اہلیہ اور بیٹی کے ہمراہ صلالہ چھ روزہ تعطیلات پر جا رہے تھے کہ ان کی گاڑی سامنے سے آنے والی ایک کار سے ٹکرا گئی۔

صبری التمیمی کے مطابق انہیں شام 4 بجے حکام کی جانب سے والد کے انتقال کی اطلاع دی گئی۔ حادثے میں ایک عمانی شہری بھی جاں بحق ہوا۔ وائرل ویڈیو میں حادثے کے مناظر دیکھے جا سکتے ہیں جس میں ایک سفید اور ایک سیاہ رنگ کی گاڑی تیز رفتاری سے آپس میں ٹکراتی ہیں۔ صبری نے تصدیق کی کہ ان کے اہل خانہ سیاہ SUV میں سوار تھے۔

محمد فرج اسپتال میں دم توڑ گئے جبکہ ان کی اہلیہ فاطمہ الہاشمی نازک حالت میں عمان کے طبی مرکز میں زیر علاج ہیں، تاہم ان کی حالت میں بہتری کی امید ہے۔ ان کی بیٹی سمیحہ حادثے میں محفوظ رہیں۔ حادثے کے وقت ان کے ہمراہ ایک اور گاڑی میں محمد فرج کی بیٹی عالیہ، داماد عبداللہ اور دو سالہ نواسہ سعید بھی موجود تھے، جو اپنی آنکھوں سے اس المناک حادثے کے گواہ بنے۔

مرحوم کے جسد خاکی کی دبئی منتقلی آج شام یا کل متوقع ہے جہاں تدفین عمل میں لائی جائے گی۔ صبری التمیمی نے کہا، "ہمارا پورا خاندان صدمے میں ہے، والد ایک عظیم انسان تھے۔”

محمد فرج نے یو اے ای آرمڈ فورسز میں 27 سال خدمات انجام دیں۔ وہ 1989 میں کینسر جیسے موذی مرض کا شکار ہوئے لیکن بہادری سے جنگ لڑی اور صحتیاب ہو گئے تھے۔ بدقسمتی سے گزشتہ پانچ سالوں میں بیماری نے دوبارہ حملہ کیا۔ ان کی اہلیہ فاطمہ الہاشمی بھی بریسٹ کینسر سے پانچ سالہ جدوجہد کے بعد صحتیاب ہو چکی ہیں۔

2012 میں دونوں میاں بیوی نے اپنے 41ویں نکاح کی سالگرہ اور یو اے ای کے 41ویں قومی دن کے موقع پر 25 میٹر لمبا پرچم تیار کیا تھا، جو انہوں نے اپنی رہائش گاہ مردف میں لہرایا تھا، بطور شکرگزاری کہ ان کے علاج اور بہترین طبی سہولیات تک رسائی ممکن ہوئی۔

**ویڈیو دیکھیں: سابق اماراتی فوجی صلالہ کے سفر کے دوران المناک حادثے میں جاں بحق**

خریف سیزن کے دوران یو اے ای کے شہری عمان کے صلالہ کا رخ کرتے ہیں، جس کے باعث سڑک حادثات میں اضافہ دیکھنے میں آ رہا ہے۔ حکام بارہا روڈ سیفٹی قوانین کی پابندی اور احتیاطی تدابیر اپنانے کی اپیل کر چکے ہیں۔

ماہرین کی جانب سے درج ذیل احتیاطی تدابیر اپنانے کی ہدایت دی گئی ہے:

* گاڑی کی مکمل جانچ پڑتال (ٹائروں کی گرفت اور بریکس کی کارکردگی)۔
* دھند اور بارش کے سبب روشنیوں کا درست استعمال (لو بیم اور فوگ لائٹس)۔
* راستے میں جانوروں کی موجودگی کا خاص خیال۔
* تیز رفتاری سے گریز اور خطرناک موڑوں پر سست روی اختیار کرنا۔