خلیج اردو
متحدہ عرب امارات کے محکمہ موسمیات نے منگل کو کئی علاقوں کے لیے گرد و غبار کے طوفان کا یلو الرٹ جاری کر دیا، جبکہ بعض علاقوں میں بارش اور ژالہ باری بھی ریکارڈ کی گئی۔
نیشنل سینٹر آف میٹرولوجی (این سی ایم) کے مطابق شام تک بارش اور ژالہ باری کے امکان کے باعث کچھ علاقوں میں اورنج الرٹ بھی جاری کیا گیا تھا۔
این سی ایم نے بتایا کہ بارش کے ساتھ طوفانی بادل بننے اور بعض اوقات تیز ہوائیں چلنے کا امکان ہے، جس کے باعث گرد و غبار پھیل سکتا ہے۔
محکمہ موسمیات کے مطابق مشرقی اور مغربی علاقوں سمیت کچھ اندرونی علاقوں میں دوپہر ایک بجے سے رات 8 بجے تک گرد و غبار کا طوفان چلنے کا امکان تھا، جس کی رفتار 45 کلومیٹر فی گھنٹہ تک پہنچ سکتی ہے۔
شہریوں کو بیرونی سرگرمیوں کے دوران احتیاط برتنے کی ہدایت کی گئی ہے۔
بارش اور ژالہ باری سے متاثرہ علاقے
متحدہ عرب امارات کے مختلف حصوں میں شدید بارش ہوئی جبکہ فجیرہ کے علاقے مربد میں ژالہ باری بھی دیکھی گئی۔
یو اے ای میں موسم سے متعلق اکاؤنٹ اسٹورم سینٹر نے مشرقی علاقے کے فلج میں گرد و غبار کے طوفان اور شدید بارش کی ویڈیوز شیئر کیں۔
ابوظہبی پولیس کی ڈرائیورز کو احتیاط کی ہدایت
ابوظہبی پولیس نے تیز ہواؤں اور گرد و غبار کے باعث حد نگاہ متاثر ہونے پر ڈرائیورز کو محتاط رہنے کی ہدایت کی ہے۔
پولیس نے شہریوں سے کہا ہے کہ دوران ڈرائیونگ موبائل فون استعمال کرنے یا ویڈیوز بنانے سے گریز کریں تاکہ اپنی اور دیگر افراد کی حفاظت یقینی بنائی جا سکے۔
گرد و غبار کے طوفان سے بچاؤ کی احتیاطی تدابیر
وزارت صحت و تحفظِ انسداد نے شہریوں کو ہدایت کی ہے کہ:
- خاص طور پر بچوں اور سانس کے مریضوں کو گھروں کے اندر رہنا چاہیے
- گھروں میں ایئر پیوریفائر اور ہیومیڈیفائر کا استعمال کریں
- باہر نکلتے وقت ماسک اور حفاظتی چشمے پہنیں
- ریت کے ٹیلوں کے قریب ڈرائیونگ سے گریز کریں
- گاڑی کے ایئر کنڈیشن کے وینٹس بند رکھیں
- دمے کے مریض اپنا ریسکیو انہیلر ساتھ رکھیں
- سانس لینے میں دشواری یا مسلسل کھانسی کی صورت میں فوری طبی مرکز سے رجوع کریں
