خلیج اردو
دبئی: دبئی کے مشہور ورلڈ آئی لینڈز میں واقع نیا پُرتعیش تفریحی مقام ’کیپ مورس‘ جمیرہ برج العرب کے انتظام میں کھولا گیا ہے، جہاں مہمان اب صرف 75 ہزار درہم سے شروع ہونے والی رقم میں پورا جزیرہ ایک دن کے لیے صرف اپنے نام کر سکتے ہیں۔
یہ جزیرہ خلیج عرب کے شفاف پانیوں اور نرم سفید ریت سے گھرا ہوا ہے، جو قدرتی حسن اور جمیرہ کی شاندار مہمان نوازی کو ایک ساتھ سموئے ہوئے ہے۔ یہاں تک رسائی صرف ایک لگژری یاٹ کے ذریعے ممکن ہے، جس کے بعد مہمانوں کو مکمل آرام، اسٹائل اور نجی ماحول میں خوش آمدید کہا جاتا ہے۔
سفر کی شروعات مرسا مرینا سے ہوتی ہے جہاں سے 64 فٹ لمبی یاٹ روانہ ہوتی ہے، جس میں تین خوبصورت کیبن، دھوپ سے روشن ڈیک اور عملہ ہمراہ ہوتا ہے۔ یہاں پہنچنے کے بعد مہمان دن بھر عمدہ کھانوں، ساحل کی تفریح اور ذاتی خدمات سے لطف اندوز ہوتے ہیں۔
جزیرے پر کئی اقسام کے تجربات پیش کیے جا رہے ہیں۔
لنچ ایکسپیریئنس میں مہمانوں کو دوپہر کے وقت تین کورس پر مشتمل گورمی کھانے سے تواضع کی جاتی ہے، جو مشیلن اسٹار شیف ساویریو سبارالی کی نگرانی میں تیار کیا جاتا ہے۔ اس تجربے میں پانی کے کھیل، سورج سے لطف اندوزی اور خلیج کے حسین مناظر شامل ہیں۔ اس کی قیمت دو افراد کے لیے 30 ہزار درہم (غیر الکوحل) یا 35 ہزار درہم (پریمیئم بیوریجز کے ساتھ) سے شروع ہوتی ہے۔
سن سیٹ ایکسپیریئنس کے دوران سورج غروب ہوتے ہی مہمانوں کو ایک خوبصورت کروز پر لے جایا جاتا ہے، جہاں تازہ سمندری کھانے، لائیو باربی کیو اور خصوصی مشروبات کے ساتھ تقریباً 20 مہمانوں کے لیے شام کا اہتمام کیا جاتا ہے۔ اس تجربے کی قیمت 30 ہزار درہم سے شروع ہوتی ہے۔
جو لوگ مکمل نجی تجربہ چاہتے ہیں وہ پورا جزیرہ ایک دن کے لیے بک کر سکتے ہیں۔ طلوع آفتاب سے غروب تک جزیرہ صرف ان کے لیے مخصوص ہوتا ہے، جہاں ذاتی عملہ، عمدہ کھانے اور لگژری سہولیات مہیا کی جاتی ہیں۔ اس نجی بکنگ کا آغاز 75 ہزار درہم سے ہوتا ہے۔
کیپ مورس 10 نومبر 2025 سے دستیاب ہوگا اور اسے دبئی کے لگژری سیاحتی مقامات میں ایک منفرد اضافہ قرار دیا جا رہا ہے، جو نجی تقریبات، کارپوریٹ ریٹریٹس یا خاندانی اجتماعات کے لیے مثالی جگہ ہے۔
