خلیج اردو
دبئی کی ٹریفک عدالت نے منشیات کے زیر اثر گاڑی چلانے اور حادثے میں کشتی اور گاڑی کو نقصان پہنچانے والے ایشیائی ڈرائیور کو جیل، جرمانے اور تین ماہ کے لیے ڈرائیونگ لائسنس معطل کرنے کی سزا سنا دی۔
عدالتی ریکارڈ کے مطابق القصیص میں ڈرائیور گاڑی ریورس کرتے ہوئے غفلت کا مظاہرہ کر رہا تھا کہ اس کی گاڑی گھر کے باہر کھڑی کشتی سے ٹکرا گئی جس کے نتیجے میں کشتی اور گاڑی دونوں کو نقصان پہنچا۔
حادثے کے بعد موقع پر پہنچنے والے پولیس اہلکاروں نے ڈرائیور کے غیر معمولی رویے کو دیکھتے ہوئے اس کی تلاشی لی تو بٹوے سے شفاف کرسٹل نما مادہ برآمد ہوا جسے کرسٹل میتھ ہونے کا شبہ تھا۔
مادہ کو فرانزک سائنس اینڈ کرمنالوجی کے جنرل ڈپارٹمنٹ بھیجا گیا جہاں لیبارٹری ٹیسٹ میں اس کے ممنوعہ نشہ آور مادہ ہونے کی تصدیق ہوگئی۔
تفتیش کے دوران ڈرائیور نے اعتراف کیا کہ اس نے حادثے کے روز گاڑی چلانے سے قبل کرسٹل میتھ استعمال کی تھی۔ اس نے برآمد ہونے والی منشیات ذاتی استعمال کے لیے رکھنے اور غفلت سے گاڑی ریورس کرتے ہوئے حادثہ کرنے کا بھی اعتراف کیا۔
عدالت نے پولیس رپورٹ، فرانزک رپورٹ اور ملزم کے اعتراف کو ٹھوس شواہد قرار دیتے ہوئے اسے منشیات کے استعمال، ذاتی استعمال کے لیے منشیات رکھنے، منشیات کے زیر اثر ڈرائیونگ اور غفلت سے دوسروں کی املاک کو نقصان پہنچانے کا مجرم قرار دیا۔
عدالت کے مطابق تمام جرائم ایک ہی مقصد سے جڑے ہوئے تھے اس لیے انہیں ایک جرم تصور کرتے ہوئے قانون کے تحت سخت ترین سزا سنائی گئی جس میں قید، جرمانہ اور تین ماہ کے لیے ڈرائیونگ لائسنس کی معطلی شامل ہے۔
