خلیج اردو
ڈھاکہ: بنگلہ دیش کے دارالحکومت ڈھاکہ کے علاقے اُتّرا میں پیر کو ایک افسوسناک واقعہ پیش آیا جہاں بنگلہ دیش ایئر فورس کا ایک تربیتی جنگی طیارہ ایک اسکول اور کالج کی عمارت سے ٹکرا کر گر گیا، جس کے نتیجے میں کم از کم 27 افراد جاں بحق اور 88 سے زائد زخمی ہوگئے، جن میں بچے بھی شامل ہیں۔
حادثہ اُس وقت پیش آیا جب چینی ساختہ F-7 BGI لڑاکا طیارہ معمول کی تربیتی پرواز پر تھا اور دوپہر 1:06 پر اُتّرا سے اُڑان بھرنے کے کچھ ہی دیر بعد تکنیکی خرابی کا شکار ہوگیا۔ طیارے نے مائل اسٹون اسکول اینڈ کالج کی عمارت کو نشانہ بنایا، جس وقت کئی بچے اسکول سے باہر نکل رہے تھے۔
عینی شاہدین نے بتایا کہ دھماکے کی آواز زلزلے جیسی تھی، اور چند لمحوں میں عمارت میں آگ بھڑک اٹھی۔ سوشل میڈیا پر وائرل ہونے والی ویڈیوز میں دکھایا گیا کہ طیارہ اسکول کے میدان کے قریب گرا، اور دھوئیں کے بادل آسمان میں بلند ہوتے رہے۔
’ناقابل تلافی نقصان‘
فائر بریگیڈ اور فوجی اہلکار فوری طور پر جائے حادثہ پر پہنچے، جہاں زخمیوں کو اسٹریچر پر اسپتال منتقل کیا گیا۔ ڈاکٹروں کے مطابق زخمیوں میں زیادہ تر کی عمریں 8 سے 14 سال کے درمیان ہیں۔ متعدد افراد جھلسنے کے باعث نازک حالت میں ہیں۔
ڈھاکہ میڈیکل کالج اسپتال کے برن یونٹ کے سربراہ نے بتایا کہ ایک تیسری جماعت کا طالبعلم مردہ حالت میں لایا گیا جبکہ تین دیگر بچے اور ایک بالغ شخص کو داخل کیا گیا ہے۔
عبوری حکومت کے سربراہ محمد یونس نے حادثے پر گہرے رنج و غم کا اظہار کرتے ہوئے تحقیقات کا اعلان کیا ہے۔ ان کا کہنا تھا کہ پائلٹ نے جہاز کو آبادی سے دور لے جانے کی کوشش کی، لیکن "تمام تر کوششوں کے باوجود” طیارہ اسکول کی عمارت سے ٹکرا گیا۔
قومی سوگ کا اعلان
حکومت نے منگل کو یومِ سوگ منانے کا اعلان کیا ہے۔ وزیر اعظم محمد یونس نے X (سابق ٹوئٹر) پر اپنے بیان میں کہا، "یہ حادثہ قوم کے لیے شدید دکھ اور صدمے کا لمحہ ہے۔ طلبہ، والدین، اساتذہ اور فضائیہ کا جو نقصان ہوا، وہ ناقابل تلافی ہے۔”
واقعے کے بعد زخمیوں کے لیے خون دینے والوں کی لمبی قطاریں دیکھنے میں آئیں۔ متاثرہ خاندانوں کے افراد غم سے نڈھال تھے، اور کئی افراد اپنے پیاروں کی تلاش میں مختلف اسپتالوں میں مارے مارے پھر رہے تھے۔
بھارت کا اظہارِ یکجہتی
بھارتی وزیراعظم نریندر مودی نے حادثے پر دکھ کا اظہار کرتے ہوئے کہا کہ "بھارت بنگلہ دیش کے ساتھ اظہارِ یکجہتی کرتا ہے اور ہر ممکن تعاون فراہم کرنے کو تیار ہے”۔
یہ حادثہ بنگلہ دیش کی حالیہ تاریخ کا بدترین فضائی سانحہ ہے، اس سے پہلے 1984 میں ایک مسافر طیارہ چٹّاگانگ سے ڈھاکہ آتے ہوئے گر کر تباہ ہوا تھا، جس میں 49 افراد جاں بحق ہوئے تھے۔
