بی بی سی کے سربراہ کا استعفیٰ، ٹرمپ کی تقریر میں ایڈیٹنگ تنازعہ کا شاخسانہ

خلیج اردو

لندن: برطانوی نشریاتی ادارے بی بی سی کے ڈائریکٹر جنرل ٹِم ڈیوی نے اتوار کے روز اپنے عہدے سے استعفیٰ دے دیا، یہ فیصلہ سابق امریکی صدر ڈونالڈ ٹرمپ کی تقریر میں کی گئی مبینہ ایڈیٹنگ پر اٹھنے والے تنازعے کے بعد سامنے آیا۔

بی بی سی کے معروف پروگرام "پینوراما” میں ٹرمپ کی چھ جنوری 2021 کی تقریر کے کچھ حصے اس طرح ایڈٹ کیے گئے کہ انہیں گمراہ کن قرار دیا گیا۔ ناقدین کے مطابق اس ایڈیٹنگ میں وہ جملے حذف کر دیے گئے جہاں ٹرمپ نے اپنے حامیوں کو پُرامن مظاہرے کی تلقین کی تھی۔

ٹِم ڈیوی نے اپنے بیان میں کہا کہ "مجموعی طور پر بی بی سی اچھی کارکردگی دکھا رہا ہے، تاہم کچھ غلطیاں ضرور ہوئیں اور بطور ڈائریکٹر جنرل ان کی مکمل ذمہ داری مجھ پر عائد ہوتی ہے۔” انہوں نے مزید کہا کہ وہ بورڈ کے ساتھ مشاورت کے بعد آئندہ چند ماہ میں باقاعدہ منتقلی کے عمل کو مکمل کریں گے۔

بی بی سی نیوز اور موجودہ امور کی سربراہ ڈیبورہ ٹرنَس نے بھی اس معاملے پر اپنے عہدے سے استعفیٰ دے دیا۔ ان کا کہنا تھا کہ "ٹرمپ ڈاکیومنٹری سے متعلق تنازعہ اس حد تک پہنچ چکا ہے کہ اس سے بی بی سی جیسے معتبر ادارے کو نقصان پہنچ رہا ہے، اور بطور سربراہ اس کی ذمہ داری مجھ پر آتی ہے۔”

برطانوی اخبار "ڈیلی ٹیلی گراف” نے حال ہی میں ایک رپورٹ شائع کی تھی جس میں بی بی سی کے داخلی مشیر مائیکل پریسکاٹ کی تیار کردہ دستاویز کے حصے شامل تھے، جس کے بعد ادارے پر دباؤ میں مزید اضافہ ہوا۔