حزب اللہ کا جنگ شروع ہونے کے بعد اسرائیل پر سب سے بڑا راکٹ حملہ، ایک ساتھ تقریباً 100 راکٹ فائر، اسرائیلی فوج نے بیروت کے ضاحیہ علاقے پر بڑے حملے شروع کر دیے

خلیج اردو
لبنان کی مزاحمتی تنظیم حزب اللہ نے جنگ کے آغاز کے بعد اسرائیل پر اب تک کا سب سے بڑا حملہ کرتے ہوئے ایک ساتھ تقریباً 100 راکٹ فائر کر دیے۔

اسرائیلی دفاعی حکام کے مطابق یہ حملہ ایران اور حزب اللہ کی مشترکہ کارروائی کے طور پر شمالی اسرائیل کی جانب کیا گیا۔ حکام کا کہنا ہے کہ راکٹ حملوں کے بعد کئی علاقوں میں ہنگامی سائرن بجائے گئے اور شہریوں کو محفوظ مقامات پر منتقل ہونے کی ہدایات جاری کی گئیں۔

دوسری جانب اسرائیلی فوج نے جوابی کارروائی کرتے ہوئے لبنان کے دارالحکومت بیروت کے جنوبی مضافاتی علاقے ضاحیہ میں حزب اللہ کے ٹھکانوں پر بڑے پیمانے پر فضائی حملوں کا آغاز کر دیا ہے۔

اسرائیلی فوجی حکام کے مطابق ان حملوں کا مقصد حزب اللہ کے راکٹ لانچنگ مراکز اور عسکری تنصیبات کو نشانہ بنانا ہے۔

تجزیہ کاروں کے مطابق حزب اللہ اور اسرائیل کے درمیان بڑھتی ہوئی جھڑپیں مشرقِ وسطیٰ میں جاری جنگ کو مزید پھیلانے کا باعث بن سکتی ہیں اور خطے میں وسیع تر علاقائی تصادم کے خدشات بڑھ رہے ہیں۔