حکومت کا تختہ الٹنے کی کوشش‘، ترک اداکار ہالیت آرینچ کو معطل قید کی سزا، عدالت نے جھوٹی گواہی قرار دی

خلیج اردو
استنبول: 28 مئی
ترکی کے مشہور اداکار ہالیت آرینچ، جنہوں نے سلطنت عثمانیہ کے معروف حکمران سلطان سلیمان کا کردار نبھایا تھا، کو عدالت نے سنہ 2013 کے حکومت مخالف مظاہروں سے متعلق جھوٹی گواہی دینے پر سزا سنائی ہے۔ اگرچہ عدالت نے انہیں دو برس تین ماہ قید کی سزا سنائی، تاہم ان کے ماضی میں کسی مجرمانہ ریکارڈ کے نہ ہونے کی بنیاد پر سزا معطل کر دی گئی۔

ترک سرکاری میڈیا کے مطابق، عدالت کا فیصلہ 23 مئی کو سنایا گیا۔ ہالیت آرینچ، جنہیں ترک سیریز The Magnificent Century میں سلطان سلیمان کے کردار سے عالمی شہرت ملی، پر الزام تھا کہ انہوں نے اپنے ساتھی اداکار میمت علی الابورا سے تعلقات کے بارے میں جھوٹ بولا۔ الابورا پر 2013 میں ہونے والے گیزی پارک مظاہروں کے دوران حکومت کا تختہ الٹنے کی کوشش کا الزام عائد ہے۔

استغاثہ کے مطابق، ہالیت آرینچ نے تفتیش کے دوران یہ دعویٰ کیا کہ وہ الابورا کو صرف بطور اداکار جانتے ہیں، لیکن تحقیقات میں ان کے درمیان درجنوں فون کالز اور پیغامات کا انکشاف ہوا، جس سے قریبی تعلق کا تاثر ملا۔ عدالت نے اس بنیاد پر ان کی گواہی کو جھوٹا قرار دیا۔

اسی کیس میں ترک اداکار رضا کجاوغلو کو بھی ایک برس آٹھ ماہ قید کی سزا سنائی گئی، تاہم ان کے کیس میں بھی سزا کو ملتوی کیا گیا۔

سماعت کے دوران ہالیت آرینچ نے موقف اختیار کیا کہ وہ فلم انڈسٹری میں بے شمار افراد کے ساتھ تصاویر کھنچواتے اور رسمی تعلق رکھتے ہیں، جن سے ذاتی تعلق نہیں ہوتا۔

واضح رہے کہ ہالیت آرینچ جلد ہی ترک ڈرامے If the King Loses میں اداکاری کرتے نظر آئیں گے، جہاں ان کی واپسی ایک بڑے کردار کے ساتھ متوقع ہے۔