دبئی کی سیاحت میں مسلسل عروج، رفتار کم ہونے کے کوئی آثار نہیں

خلیج اردو

لندن: دبئی کارپوریشن برائے سیاحت و تجارت مارکیٹنگ (DCTCM) کے ریجنل ڈائریکٹر شہاب شایان نے کہا ہے کہ دبئی اپنی محفوظ فضا، شاندار کنیکٹیویٹی اور بدلتے ہوئے سیاحتی تجربات کی بدولت دنیا بھر سے سیاحوں کو اپنی جانب متوجہ کر رہا ہے۔

انہوں نے لندن میں جاری ورلڈ ٹریول مارکیٹ (WTM) 2025 کے موقع پر گلف نیوز سے گفتگو کرتے ہوئے کہا کہ “دبئی واقعی ایک ایسا شہر ہے جو سال بھر سیاحوں کے لیے پرکشش رہتا ہے۔ ہر مہینے کچھ نیا پیش کیا جاتا ہے، چاہے وہ عالمی تقریبات ہوں یا مقامی میلوں جیسے دبئی فٹنس چیلنج، دبئی شاپنگ فیسٹیول یا دبئی سمر سرپرائزز۔ ہمارا ایونٹس کیلنڈر یقینی بناتا ہے کہ دبئی آنے کا ہمیشہ کوئی نہ کوئی نیا موقع موجود رہے۔”

ریکارڈ تعداد میں سیاح
شاہاب شایان کے مطابق دبئی نے 2024 میں 1 کروڑ 87 لاکھ سیاحوں کی میزبانی کی، جو گزشتہ سال کے مقابلے میں 9 فیصد زیادہ ہے۔ رواں سال جنوری سے اگست 2025 کے درمیان بھی 1 کروڑ 25 لاکھ سے زائد سیاح دبئی آ چکے ہیں، جو سال بہ سال 5 فیصد کا اضافہ ظاہر کرتا ہے۔

انہوں نے بتایا کہ دبئی کے ہوٹلوں کی اوسط رہائش (Occupancy Rate) 78 فیصد رہی، جو دنیا میں بلند ترین سطحوں میں شمار ہوتی ہے، اور یہ مسلسل بڑھتی ہوئی عالمی طلب کا ثبوت ہے۔

دبئی کے اس تسلسل کی بنیاد محفوظ ماحول، جدید سہولیات، پائیدار سرمایہ کاری، ویلنس اور تجرباتی سیاحت جیسے نئے رجحانات پر ہے — جو اسے عالمی سیاحت کا سال بھر کا مرکز بنائے ہوئے ہیں۔