بیرسٹر گوہر اسٹبلشمنٹ کے منظور نظر ہیں،پی ٹی آئی چیئرمین اور سیکرٹری جنرل کے اختلافات کھل کر سامنے آ گئے

خلیج اردو
اسلام آباد: پاکستان تحریک انصاف (پی ٹی آئی) کے چیئرمین اور سیکرٹری جنرل کے درمیان اختلافات عیاں ہو گئے ہیں، جب سلمان اکرم راجہ نے بیرسٹر گوہر کو منظور نظر قرار دیا۔ بیرسٹر گوہر نے اس پر شدید ردعمل ظاہر کرتے ہوئے کہا کہ "کوئی گھٹیا شہرت حاصل نہ کرے اور سیاسی پوائنٹ سکورنگ نہ کی جائے”۔

انہوں نے علی ظفر کے بارے میں بھی وضاحت دی کہ "علی ظفر کے بارے میں کبھی نہ کہا جائے کہ وہ منظور نظر بندہ ہے، کیونکہ علی ظفر نے پی ٹی آئی کے سب سے زیادہ کیسز مفت لڑے ہیں”۔ بیرسٹر گوہر نے مزید کہا کہ 25 مارچ کو بانی پی ٹی آئی کی بہنوں کو ملاقات کی اجازت نہ دینے پر سوال اٹھایا اور کہا کہ "اگر ملاقات نہیں کرائی گئی تھی تو وکلا کیوں ملاقات کے لیے گئے تھے؟”

سلمان اکرم راجہ نے اس بات پر زور دیا کہ آئندہ اگر کوئی رہنما ملاقات کرے گا جبکہ اس کا نام لسٹ میں نہ ہو، تو اس کے خلاف کارروائی کی جائے گی۔ انہوں نے کہا، "میرے کہے گئے 6 افراد کی کل بانی پی ٹی آئی سے ملاقات نہ کرا کر توہین عدالت کی گئی۔”

سلمان اکرم راجہ نے اس بات کا بھی ذکر کیا کہ "صرف منظور نظر لوگوں کو ہی ملنے دیا گیا اور بانی پی ٹی آئی نے کسی کو نہیں بلایا تھا”، اور اگر بیرسٹر گوہر ملاقات کے لیے بااختیار تھے تو علیمہ خان کی ملاقات بھی کراتے۔ انہوں نے کہا کہ "پارٹی پالیسی کے خلاف بانی سے ملاقات کرنے والے کسی اور ایجنڈے پر کام کر رہے ہیں”۔

یہ تنازع پارٹی کے اندر اختلافات کی شدت کو ظاہر کرتا ہے اور مستقبل میں مزید پیچیدگیوں کا باعث بن سکتا ہے۔