خلیج اردو
لاہور – 21 مئی 2025
پاکستان کرکٹ بورڈ نے بنگلہ دیش کے خلاف آئندہ ٹی 20 سیریز کے لیے قومی ٹیم کا اعلان کر دیا ہے، جس میں کئی سینئر کھلاڑیوں کو نظرانداز کر دیا گیا ہے۔ سابق کپتان بابر اعظم اور وکٹ کیپر بلے باز محمد رضوان کو ٹیم میں شامل نہیں کیا گیا، جب کہ شاہین شاہ آفریدی، عباس آفریدی، عبدالصمد، جہانداد خان، محمد علی، عمیر بن یوسف، سفیان مقیم اور عثمان خان بھی ٹیم کا حصہ نہیں بن سکے۔
نئی ٹیم میں تجربہ کار فاسٹ باؤلر حسن علی، آل راؤنڈر حسین طلعت، اوپنر صاحبزادہ فرحان اور نوجوان بلے باز حسن نواز کو شامل کیا گیا ہے۔ ٹیم کی قیادت سلمان علی آغا کریں گے، جو اس ہوم سیریز میں بطور کپتان پہلی بار قومی ٹیم کی قیادت کریں گے۔
ذرائع کے مطابق سلیکشن کمیٹی نے نئے کھلاڑیوں کو موقع دینے کا فیصلہ مستقبل کی حکمت عملی کے تحت کیا ہے تاکہ نوجوان کھلاڑیوں کو بین الاقوامی سطح پر تجربہ فراہم کیا جا سکے۔ بنگلہ دیش کے خلاف سیریز رواں ماہ کے آخر میں پاکستان میں کھیلی جائے گی، جس کا شیڈول جلد جاری کیا جائے گا۔
