خلیج اردو
غزہ – اسرائیل نے رات گئے غزہ کے فاہمی الجرجاوی اسکول پر فضائی حملہ کیا، جس کے نتیجے میں 25 فلسطینی شہید اور درجنوں زخمی ہو گئے۔ حملے سے اسکول میں شدید آگ بھڑک اٹھی اور عمارت کا تقریباً آدھا حصہ مکمل طور پر تباہ ہو گیا۔
سول ڈیفنس کی ٹیمیں اب بھی جائے وقوعہ پر موجود ہیں اور ملبے تلے دبے افراد کو نکالنے کے لیے امدادی کارروائیاں جاری رکھے ہوئے ہیں۔ اسکول میں بمباری کے وقت درجنوں افراد پناہ لیے ہوئے تھے، جن میں عورتیں اور بچے بھی شامل ہیں۔
غزہ کے حکام نے اس حملے کو کھلی جارحیت اور جنگی جرم قرار دیتے ہوئے عالمی برادری سے اپیل کی ہے کہ وہ اسرائیلی مظالم کو روکنے کے لیے فوری اور مؤثر اقدامات کرے۔
غزہ پر اسرائیلی حملوں میں مسلسل اضافہ ہو رہا ہے، جس کے نتیجے میں شہری آبادی، تعلیمی ادارے اور اسپتال بھی نشانہ بن رہے ہیں، جب کہ انسانی حقوق کی عالمی تنظیمیں بھی ان حملوں پر سخت تشویش کا اظہار کر چکی ہیں۔
