خلیج اردو
اسلام آباد – 3 جولائی 2025ء
پاکستان نے بین الاقوامی مالیاتی فنڈ (آئی ایم ایف) کی ایک اور اہم شرط پوری کر دی ہے، اسٹیٹ بینک کے زرِمبادلہ کے ذخائر مقررہ 14 ارب ڈالر کے ہدف سے زائد ہو گئے ہیں۔
اسٹیٹ بینک آف پاکستان کی جانب سے جاری کردہ اعداد و شمار کے مطابق، مالی سال 2025 کے اختتام پر زرمبادلہ کے ذخائر 14.51 ارب ڈالر ریکارڈ کیے گئے، جو گزشتہ مالی سال کے مقابلے میں 5.12 ارب ڈالر کا اضافہ ظاہر کرتے ہیں۔
مالی سال 2024 کے اختتام پر اسٹیٹ بینک کے ذخائر 9.39 ارب ڈالر تھے، جو کہ مالیاتی استحکام کے لیے غیر تسلی بخش سمجھے جا رہے تھے۔ تاہم، رواں مالی سال میں برآمدات، ترسیلات زر اور مالیاتی معاونت میں بہتری کے باعث ذخائر میں خاطر خواہ اضافہ ممکن ہوا۔
یہ پیش رفت آئی ایم ایف کے ساتھ جاری اسٹینڈ بائی معاہدے کے تحت پاکستان کی طرف سے کی جانے والی مالیاتی اصلاحات اور وعدوں کی تکمیل کا ایک اہم سنگ میل ہے۔ ماہرین کا کہنا ہے کہ زرمبادلہ کے ذخائر میں اضافے سے روپے کو استحکام ملے گا اور درآمدی دباؤ میں کمی آئے گی۔
