خلیج اردو
راولپنڈی، 21 مئی 2025
آئی ایس پی آر کے مطابق بلوچستان کے ضلع خضدار میں اسکول بچوں کی بس پر بھارتی حمایت یافتہ دہشتگردوں نے بزدلانہ حملہ کیا، جس کے نتیجے میں تین معصوم بچوں سمیت پانچ افراد شہید جبکہ متعدد بچے زخمی ہو گئے۔
فوج کے ترجمان نے اس حملے کو بھارت کی ریاستی سرپرستی میں ہونے والی دہشتگردی قرار دیا، اور کہا کہ بھارت، میدانِ جنگ میں مسلسل ناکامیوں کے بعد بلوچستان اور خیبر پختونخواہ جیسے علاقوں میں عدم استحکام پیدا کرنے کے لیے دہشتگردوں کا سہارا لے رہا ہے۔
ترجمان کا کہنا تھا کہ بھارتی حکومت ریاستی پالیسی کے طور پر دہشتگردی کو استعمال کر رہی ہے، جو اس کی اخلاقی پستی اور انسانی حقوق سے لاتعلقی کا منہ بولتا ثبوت ہے۔ آئی ایس پی آر نے واضح کیا کہ اس حملے کے تمام منصوبہ سازوں، معاونین اور مجرموں کو انصاف کے کٹہرے میں لایا جائے گا، اور بھارت کے مکروہ عزائم کو عالمی سطح پر بے نقاب کیا جائے گا۔
ترجمان نے کہا کہ پاکستان کی مسلح افواج اور قوم بھارتی سرپرستی میں ہونے والی دہشتگردی کے خلاف متحد ہیں، اور اس ناسور کو ہر صورت جڑ سے ختم کیا جائے گا۔
