خلیج اردو
اسلام آباد، 23 جون 2025ء
پاکستان نے ایران کی جوہری تنصیبات پر امریکی حملوں کی سخت الفاظ میں مذمت کرتے ہوئے ان کارروائیوں کو بین الاقوامی قانون کی کھلی خلاف ورزی قرار دیا ہے۔ دفتر خارجہ کی جانب سے جاری بیان میں کہا گیا ہے کہ یہ حملے دراصل اسرائیلی جارحیت کے تسلسل کا حصہ ہیں اور ان سے نہ صرف ایران بلکہ پورے خطے میں کشیدگی اور تشدد میں بے مثال اضافہ ہوا ہے۔
دفتر خارجہ نے واضح کیا کہ ایران کو اقوام متحدہ کے چارٹر کے تحت اپنے دفاع کا حق حاصل ہے اور کسی بھی خودمختار ریاست پر اس طرح کی جارحیت ناقابل قبول ہے۔ بیان میں کہا گیا کہ موجودہ صورتحال پورے مشرق وسطیٰ اور عالمی امن و استحکام پر سنگین اثرات مرتب کر سکتی ہے، اس لیے اس تنازعے کو فوری طور پر ختم کرنا ناگزیر ہے۔
پاکستان نے تمام فریقین پر زور دیا کہ وہ بین الاقوامی قوانین اور انسانی ہمدردی کے اصولوں کی مکمل پاسداری کریں اور شہریوں کے جان و مال کے تحفظ کو یقینی بنائیں۔
بیان کے اختتام میں پاکستان نے ایک بار پھر اس موقف کا اعادہ کیا کہ خطے میں پائیدار امن اور استحکام کے لیے مذاکرات اور سفارتکاری ہی واحد مؤثر راستہ ہیں، اور عالمی برادری کو چاہیے کہ وہ فوری کردار ادا کرے تاکہ جنگ کا دائرہ مزید نہ پھیلے۔
