وزیرِ اعظم شہباز شریف کا پسروڑ چھاؤنی کا دورہ، آپریشن بنیانِ مرصوص کے ہیروز کو خراجِ تحسین

خلیج اردو
راولپنڈی، 14 مئی 2025: وزیرِ اعظم پاکستان محمد شہباز شریف نے آج پسروڑ چھاؤنی، سیالکوٹ کا دورہ کیا، جہاں انہوں نے آپریشن بنیانِ مرصوص کے دوران پاکستانی افواج کی غیر معمولی جرات اور پیشہ ورانہ مہارت کو سراہا۔ اس موقع پر نائب وزیرِ اعظم و وزیرِ خارجہ، وزیرِ دفاع، وزیرِ منصوبہ بندی و ترقی اور وزیرِ اطلاعات بھی ان کے ہمراہ تھے۔ چیف آف آرمی اسٹاف جنرل سید عاصم منیر، نشانِ امتیاز (ملٹری) اور چیف آف ائیر اسٹاف، ائیر مارشل ظہیر احمد بابر سدھو، نشانِ امتیاز (ملٹری) بھی دورے کے دوران موجود تھے۔

دورے کے دوران وزیرِ اعظم کو معرکۂ حق کے تحت ہونے والی لڑائی اور کور کی موجودہ آپریشنل تیاریوں پر تفصیلی بریفنگ دی گئی۔ وزیرِ اعظم نے مسلح افواج کی شاندار کارکردگی کو سراہتے ہوئے کہا کہ پاکستانی افواج نے قوم کے غیر متزلزل عزم کے ساتھ مادرِ وطن کا بہادری سے دفاع کیا اور دشمن کی بزدلانہ جارحیت کو فیصلہ کن انداز میں پسپا کیا۔ انہوں نے کہا کہ تاریخ ہمیشہ یاد رکھے گی کہ پاکستان کے محافظوں نے چند گھنٹوں میں بھارت کی بلاجواز جارحیت کو بے مثال مہارت اور عزم سے خاک میں ملا دیا۔

وزیرِ اعظم نے فرنٹ لائن پر موجود افسران اور جوانوں سے ملاقات کرتے ہوئے ان کے بلند حوصلے، پیشہ ورانہ مہارت اور غیر متزلزل تیاری کو خراجِ تحسین پیش کیا۔ انہوں نے کہا کہ پاکستان کو اپنے بہادر سپوتوں پر فخر ہے، جو قوم کا تاج ہیں۔

انہوں نے بھارتی جارحیت کو شرمناک قرار دیتے ہوئے کہا کہ معصوم بچوں، خواتین اور بزرگوں کو نشانہ بنا کر انہیں دہشت گرد کہنا عالمی قوانین، اصولوں اور اخلاقیات کی سراسر خلاف ورزی ہے۔ وزیرِ اعظم نے کہا کہ پاکستان کی جانب سے غیر جانبدار تحقیقات کی پیشکش کو بھارت نے جان بوجھ کر نظر انداز کیا کیونکہ ان کے پاس کچھ ثابت کرنے کو نہیں تھا۔ بھارت نے جھوٹے بہانوں اور تکبر کی بنیاد پر حملہ کیا جس کا اسے منہ توڑ جواب دیا گیا، الحمدللہ۔

وزیرِ اعظم نے مزید کہا کہ ہمارے شہداء ہمیشہ قوم کا فخر رہے ہیں اور پوری قوم ان کی قربانیوں کی ہمیشہ مقروض رہے گی۔

وزیرِ اعظم کا چھاؤنی پہنچنے پر چیف آف آرمی اسٹاف اور کور کمانڈر گوجرانوالہ نے پرتپاک استقبال کیا۔