خلیج اردو
اسلام آباد:وزیرِاعظم شہباز شریف کا پیٹرولیم مصنوعات کی قیمتیں برقرار رکھنے اور بجلی کے نرخوں میں واضح کمی کا فیصلہ ۔۔۔سرکاری اعلامیے کے مطابق عالمی منڈی میں تیل کی قیمتوں میں ردوبدل سے حاصل ہونے والی مالی گنجائش کو عوام کو بڑا ریلیف دینے کے لیے استعمال کیا جائے گا۔
وزیرِاعظم شہباز شریف کا کہنا ہے کہ پیٹرولیم کی قیمتوں کو برقرار رکھتے ہوئے اس کا مالی فائدہ بجلی کے نرخوں میں کمی کی صورت میں عوام کو منتقل کیا جائے گا۔ ان کے مطابق، یہ اقدام عوام کو معاشی ریلیف دینے کے حکومتی وعدے کا حصہ ہے۔ وزیرِاعظم نے کہا کہ بجلی کے نرخوں میں کمی کے لیے ایک جامع حکمت عملی تیار کی جا رہی ہے، جس کی تفصیلات جلد حتمی شکل دے دی جائیں گی۔
وزیراعظم کا مزید کہنا تھا کہ عالمی منڈی میں تیل کی قیمتوں میں ردوبدل سے حاصل ہونے والی مالی گنجائش اور دیگر معاشی اقدامات کے ذریعے بجلی کے نرخوں میں کمی کا پیکج تیار کیا جا رہا ہے، جس کا باضابطہ اعلان آئندہ چند ہفتوں میں کر دیا جائے گا۔ اس ریلیف پیکج کے حوالے سے قوم کو وہ خود آگاہ کریں گے۔انہوں نے کہا کہ حکومت سنبھالتے ہی عوام کو ریلیف فراہم کرنا ان کی اولین ترجیح رہی ہے۔
