وزیر اعظم شہباز شریف کا نیوی ڈاک یارڈ کا دورہ، آپریشن بنیان المرصوص میں پاک بحریہ کے کردار کو زبردست خراج تحسین

خلیج اردو
راولپنڈی، 19 مئی 2025:
وزیر اعظم پاکستان محمد شہباز شریف نے آج پاک بحریہ کے ڈاک یارڈ کا دورہ کیا اور آپریشن "بنیان المرصوص” میں پاک بحریہ کے کلیدی کردار کو سراہا۔ ان کے ہمراہ آرمی چیف جنرل سید عاصم منیر اور ایئر چیف مارشل ظہیر احمد بابر سدھو بھی موجود تھے۔

وزیر اعظم کی آمد پر چیف آف نیول اسٹاف ایڈمرل نوید اشرف نے ان کا استقبال کیا۔ وزیر اعظم نے جدید ترین ٹائپ 054-A کلاس ڈسٹرائر پی این ایس تیمور کا دورہ کیا، جہاں کمانڈر پاکستان فلیٹ نے پاک بحریہ کی حکمت عملی، آپریشنل تیاریوں اور حالیہ آپریشن میں اہم کارناموں سے آگاہ کیا۔

اس موقع پر وزیر اعظم نے افسران اور جوانوں سے ملاقات کی اور ان کی پیشہ ورانہ مہارت، جنگی تیاری اور قومی دفاع سے وابستگی کو سراہا۔ انہوں نے پوری قوم کی جانب سے اعتماد اور تحسین کا اظہار کرتے ہوئے کہا کہ پاکستان کی مسلح افواج ملک کے دفاع کی ضامن ہیں۔

وزیر اعظم نے کہا کہ پاک بحریہ نے دشمن کی سمندری جارحیت کا مؤثر اور بھرپور جواب دے کر اپنی پیشہ ورانہ صلاحیتوں کا لوہا منوایا۔ انہوں نے بحری تجارتی راستوں کے تحفظ، سمندری خودمختاری اور تہہ دار دفاعی نظام کو یقینی بنانے پر پاک بحریہ کو خراج تحسین پیش کیا۔

انہوں نے پاک بحریہ کے تابناک ماضی کو یاد کرتے ہوئے کہا کہ یہ فورس "آپریشن دوارکا” جیسے جراتمندانہ اقدامات کی حامل ہے اور مستقبل میں بھی کسی بھی قسم کے چیلنج سے نمٹنے کی مکمل صلاحیت رکھتی ہے۔

وزیر اعظم کے ہمراہ وزیر دفاع خواجہ محمد آصف، وزیر منصوبہ بندی احسن اقبال، وزیر اطلاعات عطااللہ تارڑ اور وفاقی وزیر تعلیم خالد مقبول صدیقی بھی موجود تھے۔