ملتان کار ریس حادثہ؛ دو بھائیوں کو کچلنے والا رئیس زادہ گرفتار

خلیج اردو
ملتان میں کار ریس کے دوران دو بھائیوں کی المناک ہلاکت کے بعد معاملہ سنگین رخ اختیار کر گیا ہے، اور پولیس نے حادثے کا ذمہ دار رئیس زادہ ڈرائیور گرفتار کر لیا ہے۔ پولیس کے مطابق ملزم کے خلاف دفعہ 302 کے تحت مقدمہ درج کیا گیا ہے اور اسے حراست میں لے کر مزید تفتیش شروع کر دی گئی ہے۔ ڈی ایس پی راؤ طارق نے بتایا کہ واقعے کے وقت دو گاڑیاں غیر قانونی ریس میں مصروف تھیں اور اسی دوران ایک گاڑی بے قابو ہو کر دو بھائیوں پر چڑھ گئی، جس کے نتیجے میں دونوں موقع پر جاں بحق ہو گئے۔

پولیس حکام کا کہنا ہے کہ واقعے میں ملوث دوسرے ڈرائیور کی تلاش جاری ہے اور وہ بھی جلد قانون کی گرفت میں ہوگا۔ تفتیشی ذرائع کے مطابق دونوں گاڑیاں شہر کی سڑکوں پر تیز رفتاری سے ایک دوسرے کو پیچھے چھوڑنے کی کوشش کر رہی تھیں، جس کے باعث یہ مہلک حادثہ پیش آیا۔ اہل علاقہ نے غیر قانونی اسٹریٹ ریسنگ کے خلاف سخت کارروائی کا مطالبہ کرتے ہوئے کہا ہے کہ اس طرح کے واقعات شہریوں کی زندگیاں خطرے میں ڈال رہے ہیں۔