خلیج اردو
دبئی پولیس نے کرپٹو کرنسی فراڈ کے ایک بڑے مقدمے میں چھ ملزمان کو گرفتار کر لیا ہے۔ ملزمان نے ایک شہری کو غیر لائسنس یافتہ ایکسچینج کے ذریعے ڈیجیٹل کرنسی کی خرید و فروخت کے نام پر دھوکا دیا، جس کے نتیجے میں 26 لاکھ درہم مالیت کی رقم اور ڈیجیٹل اثاثے ہتھیا لیے گئے۔
دبئی پولیس کے مطابق فراڈ میں 20 لاکھ درہم نقد رقم جبکہ 6 لاکھ درہم مالیت کی کرپٹو کرنسی شامل تھی۔ متاثرہ شخص بڑی رقم کے عوض کرپٹو کرنسی خریدنے کے لیے ایک غیر لائسنس یافتہ ایکسچینج پہنچا، جہاں اس کی ملاقات گروہ کے ارکان سے ہوئی۔ ملزمان نے اسے ڈیجیٹل اثاثے ایسے ڈیجیٹل والٹس میں منتقل کرنے پر آمادہ کیا جن کے مالکان کی شناخت چھپانا ممکن تھا۔ رقم اور کرپٹو کرنسی منتقل ہونے کے بعد ملزمان نقد رقم لے کر فرار ہو گئے۔
شکایت موصول ہونے پر دبئی پولیس نے دو محاذوں پر تحقیقات شروع کیں۔ ایک ٹیم نے موقع پر شواہد جمع کیے اور ملزمان کی شناخت کی، جبکہ دوسری ٹیم نے بلاک چین تجزیے کے ذریعے مختلف ڈیجیٹل والٹس میں منتقل ہونے والے اثاثوں کا سراغ لگایا۔ رقم تیزی سے مختلف والٹس میں منتقل کیے جانے کے باوجود پولیس نے ملزمان کی شناخت کرکے انہیں گرفتار کر لیا اور چوری شدہ ڈیجیٹل اثاثے بھی محفوظ بنا لیے۔
دبئی پولیس نے شہریوں کو خبردار کیا ہے کہ وہ نامعلوم بروکرز اور غیر لائسنس یافتہ ایکسچینجز کے ذریعے کرپٹو کرنسی کی خرید و فروخت سے گریز کریں۔ حکام نے کہا ہے کہ کسی بھی مالی لین دین سے پہلے ڈیجیٹل اثاثوں کی خدمات فراہم کرنے والے ادارے کا قانونی لائسنس ضرور چیک کیا جائے۔ مشتبہ مالی سرگرمیوں کی فوری اطلاع دینے سے چوری شدہ اثاثوں کی منتقلی روکنے میں مدد مل سکتی ہے۔
