اماراتی اسکولوں کی قبل از وقت نوٹس، سردیوں کی چھٹیاں ایک ماہ تک بڑھا دی گئیں

خلیج اردو
دبئی: متحدہ عرب امارات کے متعدد اسکولوں نے اس سال قبل از وقت سردیوں کی تعطیلات کا اعلان کر دیا تاکہ والدین اپنی چھٹیاں بچوں کی تعلیم متاثر کیے بغیر پہلے سے پلان کر سکیں۔ وزارت تعلیم اور مختلف اماراتی تعلیمی اداروں نے تعلیمی سال 2025-26 کا کیلنڈر پہلے ہی منظور کر لیا ہے۔

اسکول کیلنڈر کے مطابق پہلا ٹرم ایک ماہ کی طویل سرمائی تعطیلات پر ختم ہوگا، جو گزشتہ برسوں کے تین ہفتے کے بجائے چار ہفتے پر مشتمل ہے۔ اس بار چھٹیاں 8 دسمبر 2025 سے 4 جنوری 2026 تک جاری رہیں گی جبکہ کلاسز 5 جنوری سے دوبارہ شروع ہوں گی۔ حکام کے مطابق چھٹیوں میں اضافہ طلبہ کو سخت تعلیمی ٹرم کے بعد زیادہ وقت آرام اور قومی و سماجی سرگرمیوں میں شرکت کے لیے دیا گیا ہے۔

ریجنٹ انٹرنیشنل اسکول کے پرنسپل ڈیوڈ ولیمز نے کہا کہ والدین کو پہلے سے مطلع کرنا بہت اہم ہے تاکہ وہ بلا کسی دباؤ کے سفری منصوبے بنا سکیں۔ ان کے مطابق کیلنڈر تعلیمی سال کے آغاز میں فراہم کیا جاتا ہے اور تعطیلات کے قریب مزید یاد دہانی کرائی جاتی ہے۔

رس الخیمہ کے انڈین اسکول نے بھی والدین کو سرکلر بھیجتے ہوئے اعلان کیا کہ اسکول 8 دسمبر 2025 سے 2 جنوری 2026 تک بند رہے گا اور 5 جنوری کو دوبارہ کھلے گا، تاکہ والدین وقت پر اپنے سفری منصوبے ترتیب دے سکیں۔

تاہم بعض اسکول، خاص طور پر سینئر کلاسز کے لیے، دوران تعطیلات اضافی کلاسز کا اہتمام کریں گے۔ کریڈنس ہائی اسکول کی پرنسپل دیپیکا تھاپر سنگھ کے مطابق گریڈ 10 اور 12 کے طلبہ کے لیے امتحانی تیاری کے اضافی سیشنز تعطیلات میں بھی رکھے جا سکتے ہیں۔

والدین نے قبل از وقت اطلاع کو خوش آئند قرار دیا ہے۔ دبئی کی ایک برطانوی والدہ آوا تھامپسن نے کہا کہ کرسمس کے دوران فلائٹس مہنگی ہو جاتی ہیں، اس لیے پہلے سے بکنگ کر کے وقت اور پیسہ دونوں بچائے جا سکتے ہیں۔ شارجہ کے ایک بھارتی والد راج نائیر نے بھی کہا کہ یہ سہولت ہمیں بھارت میں رشتہ داروں کے ساتھ بہتر طریقے سے منصوبہ بندی کرنے اور بچوں کی پڑھائی متاثر کیے بغیر سفر کرنے میں مدد دیتی ہے۔