دبئی کی عدالت نے ڈیزل چوری کے ایک مقدمے میں دو ملزمان کو ایک ایک ماہ قید، جرمانے اور ملک بدری کی سزا سنا دی ہے۔

خلیج اردو
عدالت کے مطابق پہلے ملزم نے رات کے وقت ایک ٹرک چرا کر اس میں موجود ڈیزل نکالا، جبکہ دوسرے ملزم نے چوری شدہ ڈیزل خریدا۔ عدالت نے پہلے ملزم پر 1650 درہم جبکہ دوسرے ملزم پر 450 درہم جرمانہ عائد کیا۔

یہ واقعہ اس وقت سامنے آیا جب ایک ٹرک ڈرائیور کمپنی کی پارکنگ میں پہنچا تو اس کی گاڑی غائب تھی، جبکہ زمین پر ٹائروں کے نشانات موجود تھے، جس پر فوری طور پر پولیس کو اطلاع دی گئی۔

پولیس نے قریبی سی سی ٹی وی فوٹیج کا جائزہ لیا، جس میں ایک شخص کو ٹرک چلاتے ہوئے دیکھا گیا۔ ملزم ٹرک کو جبل علی کے صنعتی علاقے میں لے گیا، ڈیزل نکالا اور موقع سے فرار ہو گیا۔

پولیس نے ملزم کی شناخت کے بعد اسے گرفتار کر لیا۔ تفتیش کے دوران پہلے ملزم نے اعتراف کیا کہ اس کے پاس پرانی چابی موجود تھی، جس کی مدد سے اس نے ٹرک چلایا، ڈیزل نکالا اور 450 درہم میں فروخت کیا۔ ڈیزل خریدنے والے دوسرے شخص کو بھی گرفتار کر لیا گیا۔

تحقیقات سے ثابت ہوا کہ واردات پہلے سے منصوبہ بندی کے تحت کی گئی تھی۔ دونوں ملزمان نے عدالت میں اپنے بیانات برقرار رکھے، تاہم سی سی ٹی وی فوٹیج، اعترافی بیانات اور برآمد شدہ ڈیزل کی بنیاد پر عدالت نے انہیں مجرم قرار دیا۔

عدالت نے پہلے ملزم کو رات کے وقت چوری جبکہ دوسرے کو چوری شدہ سامان رکھنے کے جرم میں سزا سناتے ہوئے دونوں کی قید مکمل ہونے کے بعد ملک بدری کا بھی حکم دیا۔

یہ فیصلہ دبئی میں جرائم کے خلاف سخت قانونی کارروائی اور قانون کی بالادستی کا واضح ثبوت ہے۔