خلیج اردو
دبئی: دبئی حکومت نے موسم گرما 2025 کے دوران سرکاری ملازمین کے لیے لچکدار اوقات کار کا اعلان کر دیا ہے، جو یکم جولائی سے 12 ستمبر 2025 تک نافذ العمل ہوں گے۔ یہ فیصلہ دبئی گورنمنٹ ہیومن ریسورسز ڈیپارٹمنٹ (DGHR) نے اتوار کو کیا، جس کے تحت ہر ادارہ اپنی صوابدید پر اس نظام کا اطلاق کرے گا۔
اس عارضی لچکدار اوقاتِ کار کا ماڈل سرکاری ہفتہ وار پانچ روزہ شیڈول سے ہم آہنگ ہوگا۔ ملازمین کو دو گروپوں میں تقسیم کیا جائے گا:
-
پہلا گروپ پیر سے جمعرات تک روزانہ آٹھ گھنٹے کام کرے گا، جب کہ جمعہ کا دن مکمل چھٹی ہوگا۔
-
دوسرا گروپ پیر سے جمعرات تک سات گھنٹے اور جمعہ کو ساڑھے چار گھنٹے کام کرے گا۔
-
یہ اسکیم پہلے بھی محدود سطح پر آزمائی جا چکی ہے۔ گزشتہ سال اگست 12 سے ستمبر 30 کے دوران 21 سرکاری اداروں میں اس ماڈل کا پائلٹ مرحلہ نافذ کیا گیا تھا۔ اس کے نتائج کے مطابق پیداواریت اور کام کے ماحول میں بہتری آئی، جب کہ ملازمین کی خوشی اور اطمینان کی شرح 98 فیصد رہی۔
دبئی کے زیادہ تر سرکاری ملازمین پہلے ہی دو دن اور آدھے دن کی ہفتہ وار تعطیلات سے مستفید ہوتے ہیں (جمعہ آدھا دن، ہفتہ اور اتوار مکمل چھٹی)۔ اس نئی اسکیم سے شامل اداروں کے ملازمین کو مزید طویل ویک اینڈ ملے گا۔
ادھر متحدہ عرب امارات بھر میں 15 جون سے "دوپہر کے وقت مزدوروں پر سورج کے نیچے کام کرنے کی پابندی” بھی نافذ ہو گئی ہے، جو روزانہ 12:30 بجے سے 3:00 بجے تک کے دوران تین ماہ تک نافذ رہے گی (15 ستمبر تک)۔
وزارت محنت و امارات کاری (MoHRE) پہلے ہی تعمیراتی مقامات پر معائنہ شروع کر چکی ہے۔ قانون کی خلاف ورزی کرنے والی کمپنیوں پر فی مزدور 5,000 درہم جرمانہ عائد کیا جائے گا، جو متعدد کارکنوں کی صورت میں زیادہ سے زیادہ 50,000 درہم تک بڑھ سکتا ہے۔
اس اقدام کے تحت ملک بھر میں 10,000 سے زائد ایئرکنڈیشنڈ آرام گاہیں قائم کی گئی ہیں، تاکہ ترسیل کرنے والے مزدور سخت گرمی کے دوران آرام کر سکیں۔
