خلیج اردو
دبئی کسٹمز نے کارروائی کرتے ہوئے 460 گرام 24 قیراط خالص سونا اسمگل کرنے کی کوشش ناکام بنا دی، جسے انتہائی مہارت سے سفری بیگ کے فریم میں چھپا کر منتقل کیا جا رہا تھا۔
دبئی کسٹمز کے مطابق اسمگلرز نے خام سونے کو پگھلا کر باریک سلاخوں کی شکل دی اور انہیں سوٹ کیس کے فریم کے اندر اس انداز میں چھپایا کہ وہ عام معائنے میں نظر نہ آئیں، تاہم جدید اسکیننگ نظام اور کسٹمز اہلکاروں کی مہارت کے باعث یہ کوشش ناکام بنا دی گئی۔
حکام کے مطابق الیکٹرانک اسکیننگ کے دوران مشکوک اشارے سامنے آنے پر بیگ کی دستی تلاشی لی گئی، جس کے دوران فریم کے اندر چھپائی گئی سونے کی سلاخیں برآمد کر کے قبضے میں لے لی گئیں۔
دبئی کسٹمز نے کہا کہ یہ کارروائی جدید اسمگلنگ طریقوں کا سراغ لگانے میں ادارے کی اعلیٰ صلاحیت اور سرحدی سلامتی کے لیے جدید ٹیکنالوجی اور تربیت یافتہ عملے کی اہمیت کو ظاہر کرتی ہے۔
حکام نے مسافروں کو سختی سے ہدایت کی ہے کہ وہ کسی دوسرے شخص کا سامان یا بیگ اپنے ساتھ سفر کے لیے ہرگز نہ لے جائیں، کیونکہ قانونی طور پر ہر مسافر اپنے ساتھ موجود سامان کا خود ذمہ دار ہوتا ہے۔
متحدہ عرب امارات کی فیڈرل کسٹمز اتھارٹی (FCA) نے بھی مسافروں کو خبردار کیا ہے کہ روانگی سے قبل کسی نامعلوم شخص کا سامان وصول نہ کریں اور نہ ہی بغیر تصدیق کے دوستوں یا دیگر افراد سے سامان کا تبادلہ کریں، کیونکہ اسمگلنگ ثابت ہونے کی صورت میں جرمانہ، قید یا دونوں سزائیں دی جا سکتی ہیں۔
