خلیج اردو
دبئی: طویل اور گرم موسمِ گرما کے بعد دبئی کے صحرا ایک بار پھر روشنیوں سے دمک اُٹھے ہیں۔ ہاف ڈیزرٹ اور القُدرہ کے علاقے ایک بار پھر خیموں کے دیہات میں تبدیل ہو گئے ہیں، جہاں سرخ اور سبز روشنیوں کے درمیان شامیں ایک دلکش منظر پیش کر رہی ہیں۔
سردیوں کے آغاز کے ساتھ ہی جیسے ہی موسم خوشگوار ہوا، دبئی کے صحراؤں میں خیموں کی سرگرمیاں دوبارہ شروع ہو گئیں۔ اہلِ دبئی اور سیاح ویک اینڈ پر باربی کیو، موسیقی اور خیمہ نشینی سے لطف اندوز ہونے کے لیے ان علاقوں کا رخ کر رہے ہیں۔
خیموں کے کرایوں میں اس سال اضافہ ہوا ہے۔ ویک اینڈ پر رات 8 بجے سے 11 بجے تک خیمے کا کرایہ 250 درہم فی گھنٹہ ہے، جب کہ 11 بجے کے بعد یہی خیمے 130 درہم فی گھنٹہ میں دستیاب ہیں۔ ایک خیمے میں 4 سے 6 افراد کے بیٹھنے کی گنجائش ہوتی ہے۔
ہاف ڈیزرٹ میں خیموں کے نگران عبد الرحیم اختر کے مطابق رواں موسم میں طلب میں غیر معمولی اضافہ ہوا ہے۔ انہوں نے بتایا کہ "اکتوبر سے ہی لوگ بکنگ کے لیے کال کرنا شروع کر دیتے ہیں، ویک اینڈ پر تو زیادہ تر خیمے مکمل طور پر بک ہو جاتے ہیں، کئی گاہک ایڈوانس میں رقم ٹرانسفر کر کے بکنگ کنفرم کرتے ہیں۔”
انہوں نے مزید بتایا کہ خیمے مختلف سائز اور سہولتوں کے ساتھ دستیاب ہیں۔ چھوٹے خیموں میں 8 سے 12 افراد بیٹھ سکتے ہیں، جہاں قالین، پانی، گرِل اور میوزک سسٹم موجود ہوتا ہے، جب کہ بڑے خیموں میں اسپیکرز، لائٹس، اور بعض اوقات پورٹیبل ایئر کولر بھی فراہم کیا جاتا ہے۔
القُدرہ میں خیمہ نگران محمد فیصل کا کہنا تھا کہ ابھی زیادہ تر لوگ شام کی ڈرائیو کے لیے آ رہے ہیں، باربی کیو سیزن کا باقاعدہ آغاز ہونا باقی ہے۔ ان کے مطابق زیادہ تر بکنگ واٹس ایپ کے ذریعے ہوتی ہے، جہاں لوگ وقت طے کر کے رقم ٹرانسفر کر دیتے ہیں اور ان کی آمد سے پہلے خیمہ تیار کر دیا جاتا ہے۔
خیموں کی بڑھتی ہوئی مقبولیت کی ایک بڑی وجہ سوشل میڈیا کو بھی قرار دیا جا رہا ہے۔ عبد الرحیم اختر کے مطابق، "لوگ انسٹاگرام اور ٹک ٹاک پر ویڈیوز اور تصاویر پوسٹ کرتے ہیں، جس سے دوسرے لوگ بھی اسی تجربے کے لیے آنا چاہتے ہیں۔ بعض خاندان تو یہاں سالگرہ یا چھوٹی تقریبات بھی مناتے ہیں، جو ریستوران کے مقابلے میں سستا اور زیادہ دلکش تجربہ ہوتا ہے۔”
