خلیج اردو
دبئی میونسپلٹی نے اعلان کیا ہے کہ سنگل یوز مصنوعات کے استعمال سے متعلق ایک جامع آگاہی اور رہنمائی گائیڈ جاری کر دی گئی ہے، کیونکہ دبئی ایک ہفتے بعد سنگل یوز پلاسٹک مصنوعات پر پابندی کے آخری مرحلے میں داخل ہونے جا رہا ہے۔ میونسپلٹی کے مطابق ایگزیکٹو کونسل ریزولوشن نمبر 124 برائے 2023 کے تحت پابندی کا یہ آخری مرحلہ یکم جنوری 2026 سے نافذ العمل ہوگا۔
یہ ریزولوشن دبئی کے ولی عہد، نائب وزیراعظم اور وزیر دفاع، اور دبئی ایگزیکٹو کونسل کے چیئرمین شیخ حمدان بن محمد بن راشد آل مکتوم کی جانب سے جاری کیا گیا تھا، جبکہ اسی تاریخ سے متحدہ عرب امارات میں سنگل یوز مصنوعات کے استعمال سے متعلق کابینہ ریزولوشن نمبر 380 برائے 2022 پر بھی عمل درآمد شروع ہوگا۔
دبئی میونسپلٹی کے مطابق آخری مرحلے میں سنگل یوز پلاسٹک مصنوعات کی ایک وسیع فہرست پر پابندی عائد کی جا رہی ہے، جن میں سنگل یوز پلاسٹک پلیٹس، پلاسٹک کٹلری بشمول چاپ اسٹکس، پلاسٹک بیوریج کپ اور ان کے ڈھکن شامل ہیں۔ اس کے علاوہ وہ مصنوعات بھی شامل ہیں جن پر 2025 کے دوران پہلے ہی پابندی لگائی جا چکی ہے، جن میں پولی اسٹائرین کپ، پلیٹس اور کنٹینرز، سنگل یوز پلاسٹک اسٹررز، پلاسٹک کاٹن بڈز، پلاسٹک ٹیبل کورز اور پلاسٹک اسٹراؤ شامل ہیں۔
میونسپلٹی کا کہنا ہے کہ اس پابندی کے مؤثر اور ہموار نفاذ کے لیے جامع گائیڈ جاری کی گئی ہے، جس کا مقصد متعلقہ اداروں کو متبادل اور منظور شدہ مواد کی نشاندہی میں مدد فراہم کرنا اور انہیں ریزولوشن کی شرائط کے مطابق منتقلی کے عمل میں سہولت دینا ہے۔ دبئی حکومت کے مختلف شراکت دار اداروں کے ساتھ مل کر میونسپلٹی عوامی اور نجی شعبوں میں پائیدار اور ذمہ دار طرزِ عمل کو فروغ دے رہی ہے تاکہ روزمرہ زندگی اور کاروباری سرگرمیوں میں ماحول دوست عادات کو فروغ دیا جا سکے۔
دبئی میونسپلٹی کے مطابق یہ اقدامات پلاسٹک مصنوعات پر انحصار کم کرنے، قدرتی وسائل کے تحفظ اور آئندہ نسلوں کے لیے ماحول کو محفوظ بنانے میں مددگار ثابت ہوں گے، جبکہ دبئی کو عالمی سطح پر ماحولیاتی جدت اور پائیداری کا ایک نمایاں شہر بنانے میں بھی اہم کردار ادا کریں گے۔
ایگزیکٹو کونسل ریزولوشن نمبر 124 برائے 2023 کا مقصد قدرتی ماحول، حیاتیاتی تنوع اور جنگلی حیات کا تحفظ، ماحول دوست رویّوں کی حوصلہ افزائی، ری سائیکل اور کثیر استعمال مواد کے فروغ اور مقامی مارکیٹ میں پائیدار متبادل کی فراہمی کو یقینی بنانا ہے۔ یہ ریزولوشن سرکلر اکانومی کے اصولوں سے ہم آہنگ ہے، جس کے تحت وسائل کے مؤثر اور پائیدار استعمال پر زور دیا جاتا ہے۔
اس ریزولوشن کا پہلا مرحلہ یکم جنوری 2024 کو سنگل یوز پلاسٹک بیگز پر پابندی کے ساتھ نافذ ہوا، دوسرا مرحلہ یکم جون 2024 کو تمام سنگل یوز بیگز تک توسیع کے ساتھ مکمل کیا گیا، جبکہ تیسرا مرحلہ یکم جنوری 2025 سے نافذ ہوا، جس میں اسٹائروفوم کپ، پلاسٹک اسٹراؤ، پلاسٹک کاٹن سوابز، پلاسٹک ٹیبل کورز، اسٹائروفوم فوڈ کنٹینرز اور پلاسٹک اسٹررز شامل کیے گئے۔
