خلیج اردو
دبئی کے حکمران شیخ محمد بن راشد المکتوم نے ایک دل کو چھو لینے والے لمحے میں 9 سالہ بچے راجر ژی سے ملاقات کی، جس نے دبئی سے اپنی محبت کا اظہار ایک خط کے ذریعے کیا تھا۔ شیخ محمد نے بچے کی حوصلہ افزائی کرتے ہوئے کہا کہ اس نے خط لکھنے کی ہمت دکھائی اور وہ اس سے بہت متاثر ہوئے۔
شیخ محمد نے ملاقات کے دوران کہا کہ انہوں نے راجر کا دبئی سے محبت کا پیغام تین بار پڑھا اور جواب میں کہا کہ “دبئی تم سے بھی محبت کرتا ہے”۔ انہوں نے بچے کی ذہانت کی تعریف کرتے ہوئے اسے ایک سمجھدار اور باہمت بچہ قرار دیا۔
ملاقات میں شیخ محمد نے راجر کو اپنی کتاب "زندگی نے مجھے سکھایا” کا دستخط شدہ نسخہ تحفے میں دیا اور کہا کہ اس کتاب میں ان کی زندگی کے اہم تجربات شامل ہیں۔ اس کے علاوہ انہوں نے بچے کو متحدہ عرب امارات کا پرچم بھی پیش کیا اور یقین دہانی کرائی کہ وہ اور ان کا خاندان دبئی اور یو اے ای میں ہمیشہ محفوظ رہیں گے۔
راجر نے اپنے والدین کے ساتھ ملاقات کے دوران شیخ محمد کا شکریہ ادا کرتے ہوئے کہا کہ “متحدہ عرب امارات میرا ملک ہے”۔ ویڈیو میں بچے کو پیانو بجاتے ہوئے بھی دکھایا گیا، جس نے اس کے فنکارانہ پہلو کو اجاگر کیا۔
شیخ محمد نے ملاقات کے اختتام پر کہا کہ وہ ہمیشہ راجر کے دوست رہیں گے اور اس کے روشن مستقبل کے لیے نیک خواہشات کا اظہار کیا۔
