دبئی میٹرو بلیو لائن: پہلا اسٹیشن، گنجائش، اور نمایاں خصوصیات منظر عام پر

خلیج اردو
دبئی – دبئی میٹرو کے نئے نیٹ ورک "بلیو لائن” کی تفصیلات سامنے آ گئی ہیں، جو نہ صرف اپنی مستقبل کی طرز تعمیر، بلکہ دنیا کے بلند ترین میٹرو اسٹیشن اور دبئی کریک کو عبور کرنے والی پہلی لائن کے طور پر توجہ کا مرکز بن گئی ہے۔

یہ نیٹ ورک گرین لائن اور ریڈ لائن کو منسلک کرے گا اور 2029 میں مکمل ہونے کی توقع ہے۔ اس کا مقصد دبئی انٹرنیشنل ایئرپورٹ سے رہائشی علاقوں کو صرف 20 منٹ میں جوڑنا اور سروس شدہ شاہراہوں پر ٹریفک دباؤ میں 20 فیصد کمی لانا ہے۔

راستہ اور اسٹیشنز
بلیو لائن دو راستوں پر مشتمل ہے اور اس میں 14 اسٹیشنز شامل ہوں گے:
پہلا راستہ گرین لائن کے کریک اسٹیشن سے شروع ہو کر دبئی فیسٹیول سٹی، دبئی کریک ہاربر، راس الخور، انٹرنیشنل سٹی 1، 2 اور 3، دبئی سلیکن اویسس اور اکیڈمک سٹی تک پھیلا ہوگا۔
دوسرا راستہ ریڈ لائن کے سینٹرپوائنٹ اسٹیشن سے شروع ہو کر مردف، الورقاء سے ہوتا ہوا انٹرنیشنل سٹی 1 پر ختم ہوگا۔

ٹریفک میں کمی اور تعلیمی مراکز سے ربط
بلیو لائن کا مقصد رہائشی علاقوں کو بہتر ٹرانسپورٹ فراہم کرنا ہے، جس سے طلبہ سمیت روزانہ سفر کرنے والے افراد کو سہولت میسر آئے گی۔
یہ نیٹ ورک دبئی اکیڈمک سٹی سے منسلک ہوگا، جو 2029 تک 50,000 سے زائد طلبہ کی میزبانی کرے گا۔ دبئی سلیکن اویسس کو بھی اس منصوبے سے جوڑا جا رہا ہے۔

مسافروں کی گنجائش اور ٹریک کی طوالت
بلیو لائن 30 کلومیٹر طویل ہوگی، جس میں پہلا راستہ 21 کلومیٹر اور دوسرا 9 کلومیٹر کا ہوگا۔ منصوبہ مکمل ہونے کے بعد دبئی کا مجموعی ریلوے نیٹ ورک 131 کلومیٹر پر مشتمل ہوگا، جس میں 78 اسٹیشنز اور 168 ٹرینیں شامل ہوں گی۔

یہ لائن روزانہ 8.5 لاکھ مسافروں کو سنبھالنے کی صلاحیت رکھتی ہے، جبکہ 2030 تک یومیہ 2 لاکھ اور 2040 تک 3.2 لاکھ مسافر اس سے استفادہ کریں گے۔

پہلا اسٹیشن اور نام رکھنے کا حق
پہلا اسٹیشن ’ایمار پراپرٹیز‘ کے نام سے منسوب کیا گیا ہے، جس کے لیے ایمار نے دس سالہ حقوق حاصل کیے ہیں۔ یہ اسٹیشن دنیا کا بلند ترین میٹرو اسٹیشن ہوگا، جسے برج خلیفہ کے ڈیزائنرز ’اسکڈمور، اوونگز اینڈ میرل‘ نے ڈیزائن کیا ہے۔

اس اسٹیشن میں قدرتی روشنی کے لیے شیشے کی چھت، زمین کے رنگوں پر مبنی ٹائلنگ اور پتھر و دھات کا امتزاج شامل ہے۔

مسافروں کی سہولت کو مدنظر رکھتے ہوئے خصوصیات
تمام اسٹیشنز میں پارکنگ، الیکٹرک اسکوٹر اسٹینڈز، ٹیکسی اسٹینڈز، نجی گاڑیوں کے لیے ڈراپ آف پوائنٹس، الیکٹرک گاڑیوں کی چارجنگ سہولت، اور معذور افراد کے لیے علیحدہ پارکنگ فراہم کی جائے گی۔

نو اسٹیشن بلند اور پانچ زیر زمین ہوں گے، جن کا بیرونی ڈیزائن سیپی کی شکل سے متاثر ہے، جبکہ اندرونی سجاوٹ سات مختلف تھیمز (ورثہ، زمین، ہوا، آگ، پانی) پر مبنی ہے۔

اقتصادی فوائد
2040 تک یہ منصوبہ ہر 1 درہم کے بدلے 2.6 درہم کے فوائد دے گا، جبکہ مجموعی فوائد 56.5 ارب درہم سے تجاوز کریں گے۔
یہ فوائد وقت، ایندھن، حادثات سے بچاؤ اور ماحولیاتی آلودگی میں کمی کی صورت میں حاصل ہوں گے۔ اسٹیشنز کے قریب جائیداد کی قیمتوں میں بھی 25 فیصد تک اضافہ متوقع ہے۔

یہ دبئی کا پہلا ٹرانسپورٹ منصوبہ ہے جو مکمل طور پر گرین بلڈنگ اسٹینڈرڈز پر پورا اترتا ہے اور ’پلاٹینم کیٹیگری‘ کی تصدیق حاصل کر چکا ہے۔