خلیج اردو
دبئی میں دیوالی کی تقریب کے دوران اچانک انتقال کر جانے والے 18 سالہ بھارتی طالبعلم ویشناو کرشناکمار کی میت تمام قانونی کارروائیاں مکمل ہونے کے بعد آج رات کیرالہ روانہ کی جائے گی۔ دبئی پولیس کی فرانزک رپورٹ کے مطابق نوجوان طالبعلم کی موت دل کا دورہ (کارڈیک اریسٹ) پڑنے سے ہوئی۔
ویشناو کے چچا نیتیش نے خلیج ٹائمز سے گفتگو میں بتایا کہ تمام دستاویزات اور کاغذی کارروائی مکمل کر لی گئی ہے، اور اہلخانہ میت کے ساتھ آخری رسومات کے لیے بھی سفر کریں گے۔ ان کے مطابق ویشناو کی میت جمعہ کی رات ساڑھے نو بجے دبئی سے روانہ کی جائے گی۔
ویشناو منگل کو دیوالی کی تقریب میں دوستوں کے ہمراہ شریک تھے جب وہ اچانک بے ہوش ہو کر گر گئے۔ پولیس کے مطابق وہ تقریب میں تقریباً ایک گھنٹہ رقص کرتے رہے اور تھکن محسوس کرنے پر کچھ دیر آرام کے لیے ہٹے، مگر تھوڑی ہی دیر بعد گر پڑے اور اسپتال پہنچنے سے قبل ہی انتقال کر گئے۔
ویشناو دبئی کی مڈل سیکس یونیورسٹی کے طالبعلم تھے اور کسی بھی قسم کی بیماری میں مبتلا نہیں تھے۔ وہ نہایت باصلاحیت، ذمہ دار اور محبت کرنے والے طالبعلم کے طور پر جانے جاتے تھے۔ ان کے چچا کے مطابق وہ اپنے اخراجات خود پورے کرنے کے لیے پارٹ ٹائم ملازمت بھی کرتے تھے تاکہ والدین پر بوجھ نہ بنیں۔
ویشناو کرشناکمار کو تعلیمی شاندار کارکردگی پر گولڈن ویزا دیا گیا تھا، وہ جیمز آور اون انڈین اسکول کے ہیڈ آف اسکول کونسل بھی رہے۔ اسکول کی پرنسپل لالیتھا سریش نے کہا کہ "پورا اسکول سوگ میں ہے، عملہ اور طلبہ شدید صدمے میں ہیں۔”
اسکول نے سوشل میڈیا پر ویشناو کو ان کی عاجزی، محبت اور ثابت قدمی کے لیے یاد کیا۔ ایک استاد نے لکھا: "ہم نے نہ صرف ایک بہترین طالبعلم بلکہ ایک غیر معمولی انسان کھو دیا ہے۔”
ویشناو کی والدہ ودھو کرشناکمار اسی تعلیمی ادارے میں معلمہ ہیں، جبکہ ان کے دوستوں نے انہیں ایسا نوجوان قرار دیا جو ہمیشہ دوسروں کے چہروں پر مسکراہٹ بکھیرتا تھا۔
