خلیج اردو
ابوظبی: متحدہ عرب امارات میں رہنے والے افراد 2026 سے ملک بھر میں تیز رفتار ریل سروس کے ذریعے سفر کر سکیں گے، جو ابوظبی سے دبئی کے درمیان صرف 25 منٹ میں مسافت طے کرے گی۔
نیشنل ایکسپرٹس پروگرام (NEP) کی رکن اور منزلوں کی تشہیر سے وابستہ ماہر سارہ لقمان نے حال ہی میں ابوظبی سے فجیرہ تک اتحاد ریل کے ذریعے سفر کیا، اور سوشل میڈیا پر بتایا کہ ابوظبی سے دبئی کا سفر صرف 25 منٹ میں مکمل ہوا، جو عموماً ڈیڑھ گھنٹے میں ہوتا ہے۔
سارہ نے اپنے ویڈیو میں تبصرے کے جواب میں لکھا: “ابوظبی سے دبئی کا سفر تقریباً 25 منٹ تھا، اس کے بعد دبئی سے فجیرہ کا سفر تقریباً 90 منٹ میں مکمل ہوا۔”
یہ سفر نیشنل ایکسپرٹس پروگرام کے پانچویں ماڈیول کے لیے کیا گیا تھا، جس میں ماہرین کو مستقبل کے ترقیاتی شعبوں میں کردار ادا کرنے کی تربیت دی جاتی ہے۔
گزشتہ ہفتے الحظفرہ ریجن کے حکمران نمائندے شیخ حمدان بن زاید النہیان اور اتحاد ریل کے وفد کے درمیان ملاقات کے دوران تصدیق کی گئی کہ 2026 میں یہ مسافر ریل سروس عوام کے لیے کھول دی جائے گی۔
آرام دہ سیٹیں اور رفتار کی نگرانی
سارہ کے ویڈیو میں دکھایا گیا کہ ٹرین میں ہلکے سرمئی رنگ کی آرام دہ نشستیں چار کی ترتیب میں رکھی گئی ہیں، جن کے درمیان میز ہے۔ اوپر بیگ رکھنے کے لیے ریک موجود ہیں، جو اکانومی کلاس کی نشستوں کا حصہ معلوم ہوتی ہیں۔
ایک علیحدہ ویڈیو میں بتایا گیا کہ ہر ٹرین میں تقریباً 400 مسافروں کے بیٹھنے کی گنجائش ہوگی، جس میں بزنس اور اکانومی کلاس شامل ہوں گی۔
ٹرین کے اندر ایک اسکرین موجود ہے جو نہ صرف روٹ دکھاتی ہے بلکہ ٹرین کی موجودہ رفتار، وقت اور باہر کے درجہ حرارت کی معلومات بھی فراہم کرتی ہے۔
چند ویڈیوز میں ٹرین کے ایک حصے پر "ادنوک اویسس” کی برانڈنگ دیکھی جا سکتی ہے، تاہم یہ واضح نہیں کہ کیا ٹرین میں ادنوک کی معروف اشیاء دستیاب ہوں گی یا نہیں۔
گزشتہ سال جنوری میں سلطان الجابر اور ادنوک کی قیادت نے اتحاد ریل کا پہلا مسافر سفر ابوظبی سے الظنہ تک مکمل کیا تھا، جہاں انہوں نے کئی اہم منصوبوں کا جائزہ بھی لیا۔
دلکش مناظر اور قدرتی حسن
سارہ کے مطابق یہ سفر نہ صرف آرام دہ اور عالمی معیار کی سہولیات سے مزین ہے بلکہ یہ ملک کے دلکش مناظر کو بھی اجاگر کرتا ہے۔ صحرا کی وسعتوں اور ہریالی کے ساتھ سفر کرنے والوں کو یو اے ای کے قدرتی حسن کا نیا رخ دکھائی دیتا ہے۔
انجینئر خلود المزروعی نے قبل ازیں کہا تھا کہ ریل کا سب سے بڑا نمایاں پہلو اس کے مناظر ہوں گے، جیسا کہ المہا کے جنگلات اور فجیرہ کی قدرتی خوبصورتی، جو عام گاڑی کے سفر میں نظر نہیں آتیں۔
گزشتہ ماہ دبئی کی روڈز اینڈ ٹرانسپورٹ اتھارٹی اور اتحاد ریل کے تعاون سے الیالیس اسٹریٹ پر تین لینز والا فلائی اوور کھولا گیا، جس سے ٹرینوں اور گاڑیوں کی آمدورفت کو علیحدہ کر کے روانی کو بہتر بنایا گیا ہے۔
