خلیج اردو
دبئی: روڈز اینڈ ٹرانسپورٹ اتھارٹی (آر ٹی اے) نے اعلان کیا ہے کہ امارات روڈ کی بڑی اپ گریڈیشن کے بعد یہ شاہراہ 25 اگست کو مکمل طور پر ٹریفک کے لیے کھول دی جائے گی۔ یہ تاریخ نئے تعلیمی سال کے آغاز سے بھی مطابقت رکھتی ہے۔
14 کلومیٹر طویل اس اہم حصے کو جو دبئی، شارجہ اور ابوظہبی کو آپس میں جوڑتا ہے، جدید ٹیکنالوجی کی مدد سے ازسرِنو بحال کیا گیا ہے تاکہ ڈرائیونگ کو مزید آرام دہ، محفوظ اور ٹریفک جام سے پاک بنایا جا سکے۔
منصوبہ دو سے تین ماہ کے دوران مختلف مراحل میں مکمل کیا گیا، جس میں فاسٹ اور سلو لینز کی مکمل ریسرفیسنگ شامل ہے۔ اس کے لیے لیزر ڈٹیکشن وہیکلز استعمال کیے گئے تاکہ سڑک کے ڈھانچے میں پائی جانے والی خرابیوں کو درست کیا جا سکے۔ بھاری ٹریفک والے حصوں میں سڑک کو مضبوط بنانے کے لیے متعدد تہوں پر مشتمل اسفالٹ بچھایا گیا ہے۔
ٹریفک اینڈ روڈز ایجنسی کے ڈائریکٹر عبداللہ لوطاہ نے بتایا کہ بھاری گاڑیوں کے گزرنے سے روڈ کا پیومنٹ کوالٹی انڈیکس (PQI) متاثر ہوا تھا جو 90 فیصد کے بجائے 85 فیصد تک گر گیا تھا۔ ان کے مطابق صورتحال سنگین ہوتی جا رہی تھی، اسی لیے مکمل بحالی ناگزیر تھی۔
یومیہ شارجہ سے دبئی سفر کرنے والے مسافر سجیف نے کہا کہ یہ اپ گریڈ ان کے لیے قیمتی وقت بچانے کا باعث بنے گا کیونکہ اب انہیں ٹریفک کے باعث تاخیر کا سامنا نہیں ہوگا اور دفتر پہنچنے میں آسانی ہوگی۔
متوقع ہے کہ 25 اگست کو دوبارہ کھلنے کے بعد امارات روڈ پر ٹریفک کی روانی بہتر ہوگی اور یہ شاہراہ دبئی، شارجہ اور ابوظہبی کے درمیان سفر کو زیادہ ہموار اور مؤثر بنا دے گی۔
