خلیج اردو
دبئی: حج 2026 کے آغاز میں دو ماہ سے بھی کم وقت باقی ہے، دنیا بھر سے لاکھوں مسلمان مکہ مکرمہ کی جانب روانگی کی تیاریوں میں مصروف ہیں۔ حج اسلام کا پانچواں رکن ہے اور ہر صاحب استطاعت مسلمان پر زندگی میں ایک بار فرض ہے، جو عاجزی اور امت مسلمہ کے اتحاد کی علامت سمجھا جاتا ہے۔
حج کا آغاز ذوالحجہ کی 8 تاریخ کے قریب متوقع ہے، تاہم حتمی تاریخ چاند نظر آنے پر منحصر ہوگی۔ اس عظیم عبادت کی بنیاد حضرت ابراہیم، حضرت ہاجرہ اور حضرت اسماعیل علیہم السلام کی قربانیوں پر ہے، جبکہ نبی کریم ﷺ کے طریقہ حج کو بھی اس میں اپنایا جاتا ہے۔
حج کی تین اقسام ہیں جن میں حج تمتع سب سے زیادہ عام ہے، جبکہ حج قران اور حج افراد بھی ادا کیے جاتے ہیں۔ پہلی بار جانے والوں کے لیے حج تمتع کو زیادہ آسان سمجھا جاتا ہے۔
حج کا آغاز احرام باندھنے سے ہوتا ہے، جس میں سادگی اختیار کی جاتی ہے۔ مکہ پہنچ کر طواف کعبہ اور صفا و مروہ کے درمیان سعی کی جاتی ہے۔ سب سے اہم مرحلہ میدان عرفات میں وقوف ہے، جسے حج کا مرکزی رکن کہا جاتا ہے۔ اس کے بعد مزدلفہ میں قیام، جمرات کو کنکریاں مارنا، قربانی اور بال منڈوانا یا کٹوانا شامل ہے، جبکہ آخر میں طواف وداع کیا جاتا ہے۔
حج کے لیے رجسٹریشن ہر ملک میں مقررہ کوٹے کے تحت ہوتی ہے اور عازمین کو سرکاری یا منظور شدہ اداروں کے ذریعے درخواست دینا ہوتی ہے۔ اخراجات پیکیج کے لحاظ سے مختلف ہوتے ہیں، جہاں بنیادی سے لے کر لگژری سہولیات تک آپشنز موجود ہوتے ہیں۔
ماہرین کے مطابق جسمانی تیاری، ویکسینیشن، ضروری ادویات اور آرام دہ سامان ساتھ رکھنا ضروری ہے، جبکہ سب سے اہم نیت کی اخلاص اور عبادت پر توجہ ہے۔ عازمین کو ہدایت کی جاتی ہے کہ وہ صبر، نظم و ضبط اور دوسروں کا احترام کریں اور غیر ضروری مصروفیات سے بچیں۔
تجزیہ کاروں کے مطابق حج صرف ایک سفر نہیں بلکہ روحانی تبدیلی کا آغاز ہے، جو انسان کو نئی زندگی اور مضبوط ایمان کے ساتھ واپس لوٹنے کا موقع فراہم کرتا ہے۔
