آئی آئی ٹی دہلی – ابوظبی کا ‘الابتکار’ پروگرام، طلبہ کے لیے اے آئی اور جدت پر خصوصی بوٹ کیمپ کا آغاز

خلیج اردو
Indian Institute of Technology Delhi کے ابوظبی کیمپس نے متحدہ عرب امارات میں نوجوانوں میں مصنوعی ذہانت، انجینئرنگ اور اختراعی سوچ کو فروغ دینے کے لیے اپنے فلیگ شپ پروگرام "الابتکار” (Al Ibtikar) کا آغاز کر دیا ہے۔

اس پروگرام کا آغاز "یو اے ای انوویشن اینڈ اے آئی بوٹ کیمپ 2026” سے ہوگا، جو 6 سے 8 جولائی 2026 تک آئی آئی ٹی دہلی – ابوظبی کیمپس میں منعقد ہوگا۔ تین روزہ رہائشی پروگرام میں متحدہ عرب امارات بھر سے گریڈ 11 اور 12 کے طلبہ شرکت کریں گے، جہاں انہیں مصنوعی ذہانت اور جدید ٹیکنالوجی سے متعلق حقیقی مسائل پر عملی کام کرنے کا موقع ملے گا۔

"الابتکار” عربی زبان کا لفظ ہے، جس کے معنی جدت (Innovation) ہیں۔ اس پروگرام کا مقصد صرف مختصر تربیت فراہم کرنا نہیں بلکہ نوجوانوں کو مسلسل رہنمائی، عملی تجربات اور ماہرین کی سرپرستی کے ذریعے مستقبل کے موجد اور کاروباری رہنما بنانا ہے۔

آئی آئی ٹی دہلی – ابوظبی کے مطابق اس پروگرام کی بنیاد 2025 میں منعقد ہونے والے انرجی اور اے آئی انوویشن بوٹ کیمپس پر رکھی گئی، جن میں متحدہ عرب امارات کے 100 سے زائد طلبہ، جن میں 72 اماراتی شہری بھی شامل تھے، نے شرکت کی۔

ان بوٹ کیمپس کے دوران طلبہ نے مصنوعی ذہانت، قابلِ تجدید توانائی، اسمارٹ سسٹمز اور پائیداری کے شعبوں میں 25 سے زائد منصوبے تیار کیے، جن کا تعلق صحت، ٹرانسپورٹ، تعلیم اور معاون ٹیکنالوجیز سے تھا۔

پروگرام میں "پچ یور ڈریم اسٹارٹ اپ” مقابلہ بھی شامل تھا، جہاں 11 ٹیموں نے صاف توانائی، اسمارٹ سٹیز اور اے آئی پر مبنی کاروباری آئیڈیاز ماہرین کے سامنے پیش کیے اور ان پر عملی تجاویز حاصل کیں۔

نئے "الابتکار” پروگرام کے تحت طلبہ کو انوویشن لیبز، ماسٹر کلاسز، ممتاز اساتذہ اور صنعت سے وابستہ ماہرین کی رہنمائی، کاروباری تربیت اور یوتھ لیڈرشپ پروگرامز میں شرکت کا موقع ملے گا۔

ادارے کے مطابق یہ اقدام متحدہ عرب امارات کی قومی مصنوعی ذہانت حکمتِ عملی 2031، نیٹ زیرو 2050 منصوبے اور "وی دی یو اے ای 2031” کے اہداف سے ہم آہنگ ہے، جن کا مقصد مصنوعی ذہانت، پائیداری اور جدت کے شعبوں میں مستقبل کے ماہرین تیار کرنا ہے۔