امریکہ میں ایئر ٹریفک کنٹرولرز کی کمی: 40 بڑے ایئرپورٹس متاثر
خلیج اردو
واشنگٹن: وفاقی حکومت کے شٹ ڈاؤن کے باعث امریکہ میں ایئر ٹریفک کنٹرولرز کی شدید قلت کے بعد نیویارک، شکاگو، اٹلانٹا اور دیگر بڑے شہروں کے ہوائی اڈوں پر فضائی آپریشن کم کرنے کا فیصلہ کیا گیا ہے۔
ٹرانسپورٹ سیکریٹری شان ڈفی کے مطابق اگر شٹ ڈاؤن کا سلسلہ جاری رہا تو جمعہ سے ایئر لائنز کو ملک کے 40 مصروف ترین ایئرپورٹس پر اپنی پروازوں کی گنجائش 10 فیصد تک کم کرنا ہوگی۔ ابتدا میں کمی 4 فیصد ہوگی، جو اگلے ہفتے تک 10 فیصد تک پہنچ جائے گی، اس سے بنیادی طور پر اندرون ملک پروازیں متاثر ہوں گی۔
فیڈرل ایوی ایشن ایڈمنسٹریشن (ایف اے اے) نے اسے "غیر معمولی اقدام” قرار دیتے ہوئے کہا کہ یہ اقدامات طویل ترین سرکاری شٹ ڈاؤن کے سبب پیدا ہونے والے سنگین آپریشنل مسائل کی عکاسی کرتے ہیں۔
ایئر لائنز اور صنعت سے وابستہ تنظیمیں ایف اے اے کے ساتھ مل کر نئی پابندیوں کے اثرات کا جائزہ لے رہی ہیں۔ تاہم، ماہرین کا کہنا ہے کہ ان اقدامات کے نتیجے میں بڑے پیمانے پر پروازوں کی منسوخی اور سفری منصوبوں میں خلل پڑے گا۔
اگر شٹ ڈاؤن آئندہ ہفتے تک جاری رہا تو حکام نے متنبہ کیا ہے کہ جزوی ایئرپورٹ بندشیں بھی ضروری ہو سکتی ہیں۔
متاثرہ ہوائی اڈوں میں شامل ہیں:
ہارس فیلڈ جیکسن اٹلانٹا انٹرنیشنل ایئرپورٹ (ATL)
شکاگو اوہیئر انٹرنیشنل ایئرپورٹ (ORD)
رونلڈ ریگن واشنگٹن نیشنل
ڈیلاس/فورٹ ورتھ انٹرنیشنل ایئرپورٹ (DFW)
ڈینور انٹرنیشنل ایئرپورٹ (DEN)
نیوآرک لبرٹی انٹرنیشنل ایئرپورٹ (EWR)
نیو یارک لاگوارڈیا ایئرپورٹ (LGA)
جان ایف کینیڈی انٹرنیشنل ایئرپورٹ (JFK)
لاس اینجلس انٹرنیشنل ایئرپورٹ (LAX)
جارج بش انٹرکانٹینینٹل ایئرپورٹ (IAH)
میامی انٹرنیشنل ایئرپورٹ (MIA)
سان فرانسسکو انٹرنیشنل ایئرپورٹ (SFO)
نیشوِل انٹرنیشنل ایئرپورٹ (BNA)
متاثرہ ایئرپورٹس پر مسافروں کو شیڈول میں تبدیلیوں، طویل انتظار، گیٹ ہولڈز اور ممکنہ کنکشن منسوخیوں کا سامنا کرنا پڑ سکتا ہے۔ پروازوں میں کمی کے نتیجے میں یومیہ 3,500 سے 4,000 پروازیں متاثر ہو سکتی ہیں، تاہم بین الاقوامی پروازوں پر اس کا اثر محدود رہے گا۔
ایف اے اے کا کہنا ہے کہ پروازوں میں کمی کا مقصد امریکی فضائی حدود میں حفاظت کو یقینی بنانا ہے، جبکہ ماہرین کے مطابق یہ شٹ ڈاؤن کے طویل ہونے سے پیدا ہونے والی سنگین مشکلات کی واضح مثال ہے۔
