خلیج اردو
ماسکو: روس کے مشرقی علاقے امور میں ایک اینتونوف-24 مسافر طیارہ گر کر تباہ ہو گیا، جس کے نتیجے میں سوار تمام 49 افراد جاں بحق ہو گئے۔ روسی خبر رساں ایجنسی تاس (TASS) کے مطابق، حادثے کا شکار ہونے والے طیارے کا ملبہ ریسکیو اہلکاروں نے تلاش کر لیا ہے۔
امور ریجن کے گورنر واسیلی اورلوف نے بتایا کہ ابتدائی معلومات کے مطابق طیارے میں 43 مسافر سوار تھے جن میں پانچ بچے بھی شامل تھے، جبکہ عملے کے چھ ارکان بھی طیارے میں موجود تھے۔
روسی ایمرجنسیز منسٹری نے اپنے ٹیلیگرام چینل پر بتایا، "روسویاتسیا (روس کی سول ایوی ایشن اتھارٹی) کے زیر استعمال ایم آئی-8 ہیلی کاپٹر نے طیارے کے جلتے ہوئے ملبے کا پتہ لگایا۔”
انٹرفیکس (IFAX) کے مطابق، طیارے کا ملبہ مشرقی امور ریجن میں ملا ہے۔ ابتدائی تحقیقات کے مطابق حادثے کی وجہ لینڈنگ کے دوران خراب موسم اور کم مرئیّت کے باعث عملے کی غلطی قرار دی گئی ہے۔
مقامی ایمرجنسیز منسٹری نے بتایا کہ یہ طیارہ سائبیریا کی ایئرلائن "انگارا” کے زیر آپریشن تھا اور امور ریجن کے چینی سرحد کے قریب واقع شہر تیندا کے ایئرپورٹ پر اترنے کی کوشش کے دوران ریڈار سے غائب ہو گیا تھا۔
