خلیج اردو
ایران کے ساتھ بڑھتی کشیدگی اور عالمی سفری دباؤ کے دوران متحدہ عرب امارات نے غیر معمولی سہولت دیتے ہوئے رہائشی اجازت نامہ ختم ہونے کے باوجود افراد کو ملک میں داخلے اور روانگی کی اجازت دے دی۔
یو اے ای کے جنرل ڈائریکٹوریٹ آف ریزیڈنسی اینڈ فارنرز افیئرز دبئی کے سربراہ محمد احمد المری نے ایک انٹرویو میں کہا کہ "یو اے ای میں سب سے پہلے انسان کو ترجیح دی جاتی ہے”۔
انہوں نے بتایا کہ ملک کے فضائی، زمینی اور بحری داخلی راستے مکمل طور پر فعال ہیں اور عملہ ہر وقت اپنی ذمہ داریاں نبھا رہا ہے، جس سے مسافروں کی آمدورفت بغیر کسی رکاوٹ کے جاری ہے۔
حکام کے مطابق ایئرپورٹس پر مسافروں نے غیر معمولی صبر اور تعاون کا مظاہرہ کیا، پروازوں میں تاخیر کے باوجود کسی قسم کی بے چینی یا بدنظمی دیکھنے میں نہیں آئی۔
اس موقع پر ایمریٹس ایئرلائن، دبئی پولیس اور سول ایوی ایشن حکام کی کارکردگی کو بھی سراہا گیا، جنہوں نے فلائٹ آپریشنز کو منظم اور مؤثر رکھا۔
محمد المری کے مطابق قیادت کی واضح ہدایات کے تحت ملک کے اندر اور باہر موجود تمام افراد کیلئے سہولتیں فراہم کی جا رہی ہیں تاکہ کسی کو مشکلات کا سامنا نہ کرنا پڑے۔
انہوں نے مزید کہا کہ یو اے ای میں شہریوں، رہائشیوں اور مہمانوں سب کو یکساں عزت دی جاتی ہے اور یہی پالیسی موجودہ بحران میں بھی نمایاں رہی۔
حکام کو عوام کی جانب سے بھرپور پذیرائی ملی، مسافروں نے شکریہ کے پیغامات کے ذریعے حکومتی اقدامات کو سراہا۔
تجزیہ کاروں کے مطابق یو اے ای کا یہ اقدام نہ صرف بحران مینجمنٹ کی مثال ہے بلکہ انسانی ہمدردی پر مبنی پالیسیوں کو بھی اجاگر کرتا ہے۔
