دبئی کے معروف سائیکل اسٹور وولفی کی شیخ زاید روڈ برانچ میں آگ لگنے سے عارضی بندش

خلیج اردو
دبئی: بدھ کی صبح کے اوائل میں شیخ زاید روڈ پر واقع ایک سائیکل ویئر ہاؤس میں شدید آگ بھڑک اٹھی، جس کے بعد دبئی سول ڈیفنس کی ٹیموں نے بروقت کارروائی کرتے ہوئے کئی گھنٹوں کی جدوجہد کے بعد آگ پر قابو پالیا۔

وولفی بائیک شاپ نے اپنی ویب سائٹ پر تصدیق کی کہ آگ ان کی شیخ زاید روڈ برانچ اور ورکشاپ میں لگی۔ بیان میں کہا گیا کہ تمام عملہ محفوظ ہے اور کسی کے زخمی ہونے کی اطلاع نہیں ملی۔

کمپنی کے مطابق عمارت تک رسائی فی الحال محدود کردی گئی ہے تاکہ حکام اور اندرونی ٹیمیں صورتحال کا جائزہ لے سکیں۔ اسی بنا پر اسٹور اور ورکشاپ کو عارضی طور پر بند رکھا گیا ہے اور دوبارہ کھولنے کی تاریخ بعد میں بتائی جائے گی۔

وولفی کے مطابق ان کی دوسری برانچیں الخوانیج، ابوظہبی اور العین میں معمول کے مطابق کھلی ہیں اور وہاں کی ٹیمیں گاہکوں کو مکمل تعاون فراہم کر رہی ہیں۔ اسی دوران آن لائن اسٹور wolfis.ae بھی آرڈرز، مصنوعات سے متعلق سوالات اور کسٹمر سپورٹ کے لیے فعال ہے، تاہم ترسیلات یا جوابات میں معمولی تاخیر ممکن ہے۔

کمپنی نے ان گاہکوں کو بھی یقین دہانی کرائی ہے جن کی بائیکس یا دیگر اشیاء شیخ زاید روڈ کی ورکشاپ میں موجود تھیں کہ متعلقہ ٹیمیں اور حکام صورتحال کا باریک بینی سے جائزہ لے رہے ہیں تاکہ درست معلومات فراہم کی جا سکیں۔

بیان میں مزید کہا گیا کہ "ہم جانتے ہیں کہ آپ کے لیے اپنی بائیکس کتنی اہم ہیں، جیسے ہی ہمیں واضح تفصیلات موصول ہوں گی ہم براہِ راست اپ ڈیٹس فراہم کریں گے۔ تمام سرکاری معلومات اسی صفحے پر جاری کی جائیں گی۔