خلیج اردو
روسی صدر ولادیمیر پوٹن نے روسی فوجی انٹیلی جنس افسر پر فائرنگ کے واقعے میں مطلوب ملزم کی گرفتاری میں تعاون پر متحدہ عرب امارات کے صدر شیخ محمد بن زاید النہیان کا شکریہ ادا کیا ہے۔ کریملن کے ترجمان دمتری پیسکوف کے مطابق دونوں رہنماؤں کے درمیان ہفتہ کی شام ٹیلیفونک رابطہ ہوا۔
اماراتی خبر رساں ایجنسی وام کے مطابق گفتگو کے دوران صدر شیخ محمد بن زاید اور صدر پوٹن نے علاقائی و عالمی امور کے ساتھ ساتھ دو طرفہ تعاون کو مزید مضبوط بنانے کے طریقوں پر بھی تبادلہ خیال کیا۔
روسی حکام کے مطابق مشتبہ شخص یوکرینی نژاد روسی شہری ہے، جسے دبئی سے گرفتار کر کے ماسکو منتقل کیا گیا۔ اس پر الزام ہے کہ اس نے روس کی جی آر یو فوجی انٹیلی جنس کے نائب سربراہ لیفٹیننٹ جنرل ولادیمیر الیکسیف کو شدید زخمی کیا۔
روس کی فیڈرل سیکیورٹی سروس کا کہنا ہے کہ ملزم کو دبئی میں حراست میں لے کر روس کے حوالے کیا گیا، جبکہ واقعے میں ملوث تین مشتبہ افراد کی نشاندہی بھی کی جا چکی ہے، جن میں مرکزی حملہ آور کوربا شامل ہے۔
روسی تحقیقاتی کمیٹی کے مطابق کوربا دسمبر کے آخر میں ماسکو پہنچا تھا اور اس پر یوکرینی انٹیلی جنس کی جانب سے “دہشت گردانہ حملے” کا ٹاسک دیے جانے کا الزام ہے، تاہم کیف نے ان الزامات کی تردید کی ہے۔
تحقیقات کے مطابق 64 سالہ لیفٹیننٹ جنرل ولادیمیر الیکسیف کو ماسکو کے شمال مغربی علاقے میں واقع ایک رہائشی عمارت میں متعدد گولیاں ماری گئیں، جس کے بعد ان کی سرجری کی گئی۔ روسی میڈیا کے مطابق وہ آپریشن کے بعد ہوش میں آ چکے ہیں۔
روسی وزیر خارجہ سرگئی لاوروف نے حملے کا الزام یوکرین پر عائد کرتے ہوئے کہا کہ یہ واقعہ امن مذاکرات کو سبوتاژ کرنے کی کوشش ہے، جبکہ جی آر یو کے سربراہ ایڈمرل ایگور کوستیوکوف اس وقت ابو ظہبی میں یوکرین کے ساتھ سیکیورٹی سے متعلق ممکنہ امن معاہدے پر مذاکراتی وفد کی قیادت کر رہے ہیں۔
یہ پیش رفت اس بات کی نشاندہی کرتی ہے کہ خطے میں سفارتی تعاون اور سیکیورٹی اشتراک عالمی تنازعات کے باوجود بدستور اہم کردار ادا کر رہا ہے۔
