خلیج اردو
ایئربس کی جانب سے A320 فیملی طیاروں کے لیے بڑے پیمانے پر جاری کردہ عالمی حفاظتی ڈائریکٹیو کے بعد سعودی عرب کی قومی ایئرلائن سعودیہ نے اپنے بیڑے پر ضروری اپ ڈیٹس کا جائزہ لینے کی تصدیق کر دی ہے۔ یہ ڈائریکٹیو دنیا کے نصف سے زائد A320 طیاروں پر اثر انداز ہو رہا ہے، جسے مینوفیکچرر کی 55 سالہ تاریخ کے سب سے بڑے ری کالز میں سے ایک قرار دیا جا رہا ہے۔
سعودیہ نے اپنے بیان میں کہا کہ وہ ممکنہ پرواز شیڈیول پر پڑنے والے اثرات کا جائزہ لے رہی ہے، اور جہاں ضرورت پڑی مسافروں کو براہِ راست مطلع کیا جائے گا۔ اسی طرح فلائی ناس کو بھی ایئربس کی جانب سے A320 بیڑے سے متعلق ہدایات موصول ہوئی ہیں، جس کے تحت احتیاطی بنیادوں پر بیڑے کے کچھ حصے میں سافٹ ویئر اور تکنیکی ری کیلیبریشن کی جائے گی۔
ایئرلائن کے مطابق اس عمل کے باعث کچھ پروازوں کے ٹرن اراؤنڈ ٹائم میں اضافہ اور شیڈیول میں تاخیر ممکن ہے۔ جن مسافروں کی پروازیں متاثر ہو سکتی ہیں، انہیں ایس ایم ایس یا ای میل کے ذریعے براہِ راست مطلع کیا جائے گا، جبکہ فلائیٹ اسٹیٹس ویب سائٹ پر بھی دیکھا جا سکے گا۔ فلائی ناس نے واضح کیا کہ یہ اقدامات اعلیٰ ترین حفاظتی معیارات برقرار رکھنے کی پالیسی کا حصہ ہیں۔
ایئربس کے مطابق دنیا بھر میں 6,000 سے زائد A320 فیملی طیاروں کو فوری مرمت کی ضرورت ہے، جب کہ ڈائریکٹیو 350 سے زیادہ عالمی آپریٹرز کو متاثر کر رہا ہے۔ حکم نامہ ایک ایسے وقت سامنے آیا ہے جب امریکہ میں سال کے مصروف ترین سفری ویک اینڈز میں سے ایک جاری ہے، اور ڈائریکٹیو کے وقت دنیا بھر میں تقریباً 3,000 A320 طیارے فضاء میں موجود تھے۔
مرمت کے لیے بنیادی طور پر سافٹ ویئر کو پرانے ورژنز پر واپس لانا شامل ہے، جو تکنیکی طور پر سادہ عمل ہے، لیکن اسے مکمل کیے بغیر طیارے معمول کے مطابق آپریشن نہیں کر سکیں گے، سوائے اس کے کہ انہیں خصوصی فیری فلائٹس کے طور پر مینٹیننس سینٹر منتقل کیا جائے۔
سعودیہ، فلائی ناس اور دنیا بھر کی دیگر ایئرلائنز اس عالمی ری کال کے آپریشنل اثرات کا جائزہ لے رہی ہیں، جس کے باعث فضائی سفری شیڈیول میں بڑے پیمانے پر خلل پڑنے کا اندیشہ ہے۔
