خلیج اردو
شارجہ: یکم نومبر سے اماراتِ شارجہ میں لین کے درست استعمال سے متعلق قانون کے نفاذ کے بعد پولیس نے مقررہ راستوں کی خلاف ورزی پر 30 ہزار سے زائد چالان جاری کیے ہیں۔ اس قانون کے تحت ڈلیوری بائیکس، بھاری گاڑیوں، موٹر سائیکلوں اور بسوں کے لیے مخصوص لینز مقرر کی گئی ہیں تاکہ سڑکوں پر ٹریفک کی روانی بہتر بنائی جا سکے اور حادثات میں کمی لائی جا سکے۔
قانون کے مطابق انتہائی دائیں جانب والی لین بھاری گاڑیوں اور بسوں کے لیے مختص ہے، جبکہ موٹر سائیکل سواروں کو تیز رفتار بائیں لین استعمال کرنے کی اجازت نہیں۔ چار لین والی سڑکوں پر موٹر سائیکل سوار صرف دائیں جانب کی دو لینز استعمال کر سکتے ہیں، تین لین والی سڑکوں پر درمیان یا دائیں لین، جبکہ دو لین والی سڑک پر صرف دائیں لین استعمال کرنے کی اجازت ہے، جو ٹریفک قوانین کے مطابق ہے۔
پولیس کے مطابق بھاری گاڑیوں کی جانب سے مقررہ لین کی خلاف ورزی پر 1500 درہم جرمانہ اور 12 بلیک پوائنٹس عائد کیے گئے، جبکہ ٹریفک اشاروں اور قواعد کی خلاف ورزی پر اضافی 500 درہم جرمانہ بھی کیا گیا۔
شارجہ پولیس نے قوانین کی نگرانی کے لیے اسمارٹ ریڈارز، جدید کیمروں اور ٹریفک پیٹرولز کا استعمال کیا، جبکہ تمام سڑک استعمال کرنے والوں سے اپیل کی گئی ہے کہ وہ مقررہ راستوں کی پابندی کریں اور ٹریفک ہدایات پر عمل کر کے اپنی اور دوسروں کی حفاظت کو یقینی بنائیں۔
