خلیج اردو
شارجہ: رکنِ اعلیٰ کونسل اور حاکم شارجہ شیخ ڈاکٹر سلطان بن محمد القاسمی کی نواسی کی شادی اتوار، 21 ستمبر کو انجام پائی، جس کا اعلان ان کی والدہ شیخہ بدور بنت سلطان القاسمی نے پیر کے روز کیا۔
تقریب میں دلہن سفید لباس میں جگمگاتی روشنیوں کے نیچے اسٹیج پر نمودار ہوئیں، جو ہر دیکھنے والے کے لیے یادگار لمحہ تھا، مگر شیخہ بدور کے لیے یہ لمحہ انتہائی ذاتی اور جذباتی تھا۔ انہوں نے اپنی بیٹی کو نئی زندگی کے سفر میں قدم رکھتے ہوئے محبت بھری نگاہوں سے دیکھا اور اسے اپنی ’چھوٹی بچی‘ قرار دیا۔
شیخہ بدور نے سوشل میڈیا پر بیٹی کی تصویر شیئر کرتے ہوئے لکھا کہ اپنی بیٹی کو شادی کے جوڑے میں دیکھنا ان کی زندگی کے سب سے زیادہ جذباتی اور خوشگوار لمحات میں سے ایک تھا۔ انہوں نے کہا کہ وہ بیٹی جس کا ہاتھ میں تھاما کرتی تھی، آج ایک خوبصورت، پُر وقار اور مضبوط عورت بن گئی ہے جو اپنی نئی زندگی شروع کر رہی ہے۔
انہوں نے بیٹی کو اس نئے سفر پر مبارکباد دیتے ہوئے کہا کہ اگرچہ آج وہ دلہن ہے، مگر ہمیشہ ان کی ’چھوٹی بچی‘ رہے گی۔
اس اعلان کے بعد صارفین نے کمنٹس میں نیک خواہشات کا اظہار کیا اور دلہن کے لیے خوشیوں بھری زندگی کی دعا کی، جبکہ متعدد صارفین نے ’مبروک‘ لکھ کر مبارکباد دی۔
شیخہ بدور اپنی تعلیمی اور کاروباری خدمات کے ساتھ ساتھ بے گھر بچوں کی مدد، نابینا افراد کی وکالت اور عالمی سطح پر خواندگی کے فروغ کے لیے بھی سرگرم کردار ادا کر رہی ہیں۔
