خلیج اردو
متحدہ عرب امارات میں مقیم ایک سماجی کارکن کے مطابق ہفتے کی صبح ابوظبی میں پیش آنے والے ایک المناک ٹریفک حادثے میں تین بھارتی بہن بھائی اور ان کی گھریلو ملازمہ جاں بحق ہو گئے۔ حادثہ شاہامہ کے قریب ابوظبی–دبئی روڈ پر پیش آیا، جہاں وہ جس گاڑی میں سفر کر رہے تھے وہ حادثے کا شکار ہو گئی۔ واقعے کی مزید تفصیلات کے لیے خلیج اردو نے ابوظبی پولیس سے رابطہ کیا ہے۔
متوفی بچوں کا تعلق بھارت کی جنوبی ریاست کیرالہ سے تھا اور وہ راس الخیمہ کے رہائشی تھے۔ اہلِ خانہ کے مطابق یہ خاندان دارالحکومت میں ایک ثقافتی میلے میں شرکت کے بعد واپس لوٹ رہا تھا۔ سماجی کارکن نے بتایا کہ حادثے میں بچوں کے ساتھ ان کی گھریلو ملازمہ بھی جان کی بازی ہار گئی، جبکہ والد، والدہ اور ان کا چودہ سالہ بچہ شدید زخمی حالت میں ابوظبی کے ایک اسپتال میں زیر علاج ہیں۔
سماجی کارکن کے مطابق خاندان کے قریبی رشتہ داروں نے درخواست کی ہے کہ جاں بحق افراد کی تدفین ابوظبی میں ہی کی جائے، تاہم اس کے لیے خصوصی اجازت درکار ہے۔ ان کا کہنا تھا کہ یو اے ای میں عمومی طور پر غیر ملکی شہری کی تدفین اسی امارت میں کی جاتی ہے جہاں اس کا رہائشی ویزا جاری ہوا ہو، اور ابوظبی میں تدفین کے لیے خصوصی اجازت حاصل کرنے کی کوششیں کی جا رہی ہیں۔
