خلیج اردو
یو اے ای کی ریاست راس الخیمہ میں موسلا دھار بارش کے دوران ایک بھارتی تارکِ وطن جاں بحق ہو گیا۔ بھارتی میڈیا رپورٹس کے مطابق جمعرات کی علی الصبح شدید بارش کے باعث بیس کی دہائی کے اواخر میں عمر رکھنے والے نوجوان نے ایک عمارت میں پناہ لی تھی، تاہم کچھ ہی دیر بعد وہ جان کی بازی ہار گیا۔
ال مامورہ کے ایک مقامی رہائشی نے، جس نے شناخت ظاہر نہ کرنے کی درخواست کی، بتایا کہ متوفی نوجوان حال ہی میں شادی کے بعد واپس یو اے ای آیا تھا اور ہمیشہ مسکراتا رہتا تھا۔ عینی شاہد کے مطابق وہ ایک شوارما شاپ میں بطور ڈیلیوری بوائے کام کرتا تھا اور واقعے کے وقت شوارما کی ترسیل کے لیے نکلا ہوا تھا۔
تاحال یہ واضح نہیں ہو سکا کہ نوجوان کی موت کس وجہ سے ہوئی۔ خلیج ٹائمز نے اس حوالے سے راس الخیمہ پولیس سے مؤقف کے لیے رابطہ کیا ہے۔
دوسری جانب ملک میں غیر مستحکم موسمی حالات برقرار رہنے کا امکان ظاہر کیا گیا ہے، مشرقِ وسطیٰ میں کم دباؤ کا نظام جمعہ تک موجود رہنے کی پیش گوئی کی گئی ہے۔ جمعرات کے روز یو اے ای کے مختلف حصوں میں شدید بارش کے باعث متعدد گھروں اور تجارتی مقامات میں پانی داخل ہو گیا، جب کہ وزارتِ انسانی وسائل و اماراتی کاری نے شدید متاثرہ علاقوں میں نجی شعبے کے اداروں کو جمعہ کے روز ریموٹ ورک کی اجازت دینے کی ہدایت کی ہے، اس دوران کئی تقریبات منسوخ اور پارکس و ساحلی مقامات بند کر دیے گئے۔
