خلیج اردو
خلیج تعاون کونسل کے رکن ممالک نے مشترکہ سول ایوی ایشن اتھارٹی کے قیام کی منظوری دے دی ہے، جس کا ہیڈکوارٹر متحدہ عرب امارات میں قائم کیا جائے گا۔ بحرین میں بدھ، 3 دسمبر کو ہونے والے 46ویں جی سی سی سربراہی اجلاس میں اس فیصلے کا اعلان کیا گیا، جو رکن ممالک کے درمیان فضائی رابطوں کے معیار، ہم آہنگی اور انضمام کو مضبوط بنانے کی کوششوں کا حصہ ہے۔
اجلاس میں جی سی سی ریلوے منصوبے کے عمومی معاہدے کی بھی منظوری دی گئی، جس کے تحت 2026 تک سعودی عرب، یو اے ای، عمان، قطر، کویت اور بحرین کو باہم ریل کے ذریعے جوڑا جائے گا۔ اس منصوبے سے سفری وقت کم ہوگا اور خلیجی ممالک کے درمیان زمینی سفر میں نئی سہولتیں پیدا ہوں گی۔
قبل ازیں جی سی سی نے ‘ون اسٹاپ’ ٹریول سسٹم کی بھی منظوری دی تھی جس کے تحت خلیجی شہری تمام چیکس—امیگریشن، کسٹمز اور سکیورٹی—ایک ہی پوائنٹ پر مکمل کر سکتے ہیں۔ یو اے ای اور بحرین کے درمیان اس پائلٹ سسٹم کا آغاز اسی ماہ ہو چکا ہے اور ابتدائی کامیابی کی صورت میں اسے دیگر رکن ممالک تک بھی توسیع دی جائے گی۔
